Vakavinavinakataki na Nodra Yalodina na Lewe ni Bose e Namosi
Era vakavinavinakataka na Turaga Paraiminisita o Voreqe Bainimarama, na nodra yalodina na lewe ni matabose ni yasana vakaturaga o Namosi (Provincial Council Meeting) ena itavi era sa kacivi kina. “Au gadreva me’u vakavinavinakataka na Matabose ni Yasana ena nomuni sasagataka na veivakatorocaketaki ena nomuni yasana. Na nomuni cakacakataka na tatadra levu ni matanitu sa tiki ni nomuni vakaitavi ena rawa ka ni noda matanitu,” era tukuna. Era tukuna ni yasana o Namosi e sega soti sara ni vanua levu ia ena yaga mera vuli kina na vo ni veiyasana.
Era kaya ni ra sa vakadinadinataka ni na rawati ga na sautu ni vanua kevaka e vakacokotaki ena kena ta na gaunisala, tara na wavu vou, tara na valenivuli kei na valenibula vou, kena inaki levu me vakarawarawataka na noda qaravi, ka gadrevi talega na noda taqomaki ena revurevu ni draki veisau. Era kuria ni sa vakadinadinataki ena siga Tusiti na nodra cakacaka vata kei na matanitu me tara rawa kina na vale vou, ka rawati ga qo ni tubu tiko na bula vakailavo ni noda matanitu.
Ena yasana o Namosi, ena yabaki oqo sa vakacavari kina na tara ni valenibula vou e Namelimeli. “Me yacova na gauna au vosa tiko kina oqo, sa qaravi tiko na veivakalivalivataki e Naqarawai kei Wainikoroiluva, ka sa biu na sola i Naqara, Nukusera kei Navunisoco. Sa tara tale tikoga edua na Co-operative Center vei ira na dauteitei, kei na dua na idrodro ni cagilaba e Salidrau.”
Mai Wainadoi era tukuna ni tara tiko kina e dua na valenivolavola ni Tabana ni Teitei, me qarava vakatabakidua na nodra yasana. Sa vakadrodroi talega na wai e Wainadoi, na koronivuli o Nakuvu, koronivuli o Wainilotulevu, Nakavika kei Nukusere.
Ena dua na gauna lekaleka mai oqo sa na tekivutaki kina na ta ni gaunisala vou ki Nayavu.
Era tukuna ni veivakatorocaketaki e dau taura na gauna, baleta ni gadrevi me tuvani vakamatau ka yadravi na kena cakacakataki, me rawati kina na inaki ni kena qaravi.
E dua na ka era vakabibitaka ni veivakatorocaketaki qo ena laveta na nodra bula, ka ra na rawa ka vakatautauvata kei ira era tiko ena vanua ni cakacaka.
Na yasana o Namosi e sa vakadinadinataka e levu na veivakatorocaketaki, ia e sega walega ni nodra yasana, me vaka ni oka talega kina o Ba, Rewa, Naitasiri, Lau, Macuata – kei ira na vo ni veiyasana. Na cakacaka qo era tukuna e rawati ga ena nodra qarava vakatautauvata na lewenivanua; ka sa tagutuvi kina na cakacaka butobuto ni nodra dau veiliutaki o ira na noda iliuliu ni matanitu e liu.
O ira oqo era vakatorocaketaka ga na nodra yasana ka guilecava na kena vo.
“Eda sa vakadinadinataka ni matanitu e veiqaravi tiko ena gauna qo e qaravi keda kece na lewenivanua e Viti, ka tuvana na ituvatuva e yaga raraba vei keda kece. Oqo na ibalebale ni ka au tukuna tiko ni da sa tiko vata ga ena dua na rara ni qito tautauvata vinaka.
Eda sa vakaivotavota kece ena veivakatorocaketaki ni matanitu, ka ra vukei na lewenivanua me vaka ga na veika era gadreva.”
Era vakavinavinakataki iratou na Matabose ni Yasana ena nodra sureti mera la’ki dolava na Bose ni Yasana ka ra nuitaka ni na dua na bose vinaka.