Sega ni veisau na ivakarau ni veiqaravi
Evakadeitaki na Vunivola Tudei ni Tabacakacaka iTaukei o Naipote Katonitabua, ni sega vakadua ni sa veisau na noda itovo ni veiqaravi vakavanua na itaukei.
E levu era sa tabaka ena mona livaliva ni veiqaravi vakaturaga vakavanua eratou vakaitavi kina mai Veiseisei, Vuda sa kune kina na veisau. Na veisau era tukuna tiko oqo na kena sa sega ni cavuti na matanitu e tolu o Kubuna, Burebasaga kei Tovata ena veiqaravi vakaturaga.
E vakaraitaka o Katonitabua ni a nanuma na Tabacakacaka iTaukei me ratou veiqaravi na matanitu e tolu, ia e sega ni rawa baleta na veilecalecavi e tiko ena loma ni matanitu e tolu, ena itikotiko ni veiliutaki. Sa mani nona kina na madigi na vanua o Vuda, ni oqo e dua na vanua e dei tu na nodratou itovo vakavanua. E sega vakadua ni veisau, ka kena ivakaraitaki ga ni leqa na nodra turaga e buli tale edua ni se bera mada ga na bogi va. “Na nodratou veiqaravi e kovuta taucoko na noda vanua, ni ko ira na tubetube ra tukuna tiko na yasana e tinikava, na veimatalotu kei ira na vulagi era sa mai tu ena noda vanua, kei rau na veiliutaki ni noda matanitu na Turaga Peresitedi kei na Turaga Paraiminisita,” e tukuna o Katonitabua.
O Vuda kei na vanua o Nakelo e tukuna ni rua na vanua veiwekani ga. Nai wase ni yaqona vakaturaga, e tukuna ni a dodonu me rau wase ia eratou qai kaya mai Vuda me sa kau ga ki Nakelo ni ko ratou mai na Ra ni noda vanua eratou lako mai vakayawa. E vakadeitaka talega o Katonitabua ni sa qai la’ki vakayacori na iluva ni vesa vei iratou mai Nakelo e Draiba. E kuria ni qai vakacabori talega na kamunaga vei rau na vanua e rua ena nodrau mai vakaitavi ena veikidavaki vakavanua. E tukuna talega o Katonitabua ni ra marautaka na Turaga Paraiminisita o Voreqe Bainimarama na veikidavaki vakavanua.