Tui Matuku: Rawa na ka ena duavata
Era tataunaka na turaga na Tui Matuku, o Roko Lorima Niumataiwalu, kivei ira na lewenivanua e Matuku ena lotu ni tikina ena Sigatabu ena Sukhu Park, Raiwasa, ni ra na rawata na veika era gadreva ena nodra duavata.
Na lotu oqo era a vakavinavinakataka kina na Kalou ena veivuke kei nai gu e soli vei ira na lewe i Matuku era tu e na delaniyavu, ko ira era sa tu mai valagi kei ira na tu ena vanua ni cakacaka, ena kumuni lavo siga rua era sa qarava. Era kumuna rawa kina e $178,000. Era vakavinavinakataki ira na sa tu mai valagi ena nodra rogoca na kaci ni vanua mera mai dolava ka sogota na kumuni lavo.
Era dolava na soqo na Matuku era tu mai Mereke ena $50,700 ka ra sogosogo mai Ositerelia ena $50,610.
E tukuna o Roko Lorima ni sa mai kumuni e dua na ilavo levu ena nodra duavata mai valagi, ko ira mai vanua kei ira na tu ena vanua ni cakacaka.
Na duavata ni lewenivanua o Matuku, era tukuna, ena rawa kina na nodratou ituvatuva na lewe ni komiti ni veivakatorocaketaki ni tikina.
Era kerei ira na lewenivanua mera gumatuataka na nodra cakacaka me bula kina na nodra matavuvale, ka vaka kina na rogoci ni kerekere ni komiti.
Era nuitaka ni duavata sa mai vakaraitaki ena soqo siga rua sa mai cava ena laurai tale kevaka era na vakayacori tale e dua na soqo ni Matuku. Era tataunaka talega me qaravi sara vakaukauwa na lotu. Na jemeni ni komiti o Simeli Tuivaga e tukuna ni lavo sa mai kumuni rawa ena vakayagataki ena veika eratou sa tuvana oti tu ka wili kina na kena voli e dua na iyau me vaka na vale ka ra vukei talega na vuli.
Na tikina o Matuku e tiko kina e vitu na koro ka wili kina o Yaroi (koro liu), Natokalau, Qalikarua, Levukaidaku, Makadru, Raviravi kei Lomaji.
E tukuna o Tuivaga ni ratou na vinakata me na dua tale na Matuku Day, vakabibi ni soqo e vakaraitaka na duavata ni lewenivanua ka vakaukauwataka na bula ni veiwekani.