Na takitaki eda sema dra kina vei ira na wekada

Na bula vakaitaukei edau kamikamica ni da vakamuria vinaka na itovo vakavanua me baleta na veisoqo edau vakayacori. E dua na cakacaka vakavanua oqo na takitaki era dau vakayacora ga na marama, ia ena veisau ni draki ni bula eda sa donuya tiko oqo, era sa takitaki talega na turaga.

A takitaki sai koya na noda kauta na kakana buta kina dua na vale tani, se kina dua na soqo. Ena dua na vakadidike e vakaitavi kina o Naomi Koroisamanunu mai na Tabana ni Vosa kei na iTovo Vakaviti e tukuna kina – “Eda na takitaki vei ira eda sema vakadra kina, vei ira na wekada, vei ira na vulagi era mai tiko ena dua tani tale na vale, kina vale ni turaga se vei ira ga eda nanuma ke sa buta e dua na kakana laurai vakavudua se vakagauna ga.”

Ena bula vakaitaukei e dau kena ivakarau talega meda takitaki lesu vei ira era a takitaki mai vei keda ena dua na gauna e liu. Eda rawa ni kau kakana dina ga me vaka na uvi, dalo, vudi, kawai, uto.

E rawa nida takitaki icoi ga me vaka na ura, urau, vonu kovu se ika. E rawa talega nida kauta vata na kakana dina kei na kena icoi.

Se da takitaki qalu ga se vudi vakasoso se kakana cava ga e levu tu vei keda.

E liu ni ra takitaki na marama kina vale ni turaga, era talia rawa mada na ilalakai me tabei kina na kena na turaga.

E dau tu cokocoko talega na uvi se dalo e kau me vakaraitaka na lelevu ni lewe ni qele. Era sa na dui sakitaka lo tiko ga na marama na lewe ni nodra takitaki, ni sa ivakaraitaki tiko ni kaukauwa se na igu ni liga idui watidra se o koya a tea.

Na takitaki ina vale nei Talatala, na Tale Vunau, e dau tali na kena sova me qai tawa kina na lewe ni takitaki.

Na takitaki ga kina dua tale na wekada se itokani, eda sa vakayagataka ga na veleti meda vakatawana kina na lewe ni takitaki.

Ni sa la’ki tau na kakana ena kena vale, se kau tikoga kina vale ni dua na wekada, se vulagi, se kina vale ni turaga se talatala, eda na dabe, da vakacobocobo.

Kevaka eda takitaki tiko ga kina vale nei dua na wekada se itokani, e dau kena ivakarau, me vakalala na veleti na itaukei ni vale, oya me biuta na kakana a kau yani kina na dua na nodratou veleti, vakatawana tale eso na kakana ena veleti, qai vakasuka na veleti vua a takitaki yani.

Ia, o keda na takitaki tiko yani, eda sega ni waraka meda kauta lesu mai e dua na ka. Ena so na gauna ena tukuna o itaukei ni vale, ena qai vakasukai vakamalua yani na noda veleti.

Ena so tale na gauna, eda na raica tiko ga ni sega ni veisautaka na veleti eda kau kakana yani kina, eda sa kila ni na qai kau malua ga yani na noda veleti baleta beka ni sega ni rawa ni vakatawani lesu mai na noda veleti. Sa dodonu meda sa tatau sara talega meda lesu.

Na noda veinanumi ena kakana vakaoqo, e ivakasosoko ni dra vakaveiwekani ka ivakadei ni noda itikotiko vakavanua.