NA SOQO SIGA RUA NI ADI NAMOSI
Sa na vakayacori tiko mai Navua ena rara na Red Cross Park ni mataka na soqo siga rua ni Adi Namosi.
E vakadeitaka mai kina Siga Vou na Roko Tui Namosi o Rupeni Kunaturaga ni takete me kumuni rawa e $150,000, e na tekivu na soqo ena Lotulevu ka cava ena Vakaraubuka.
Era na dolava na soli ko ira na gone ni Namosi era tu mai valagi ka ra na sogosogo na iSoqosoqo Vakamarama e Namosi.
Na Red Cross Park e koto volekata na Ro Matanitobua House.
Na ilavo ena kumuni ena vakayagataki ena soli ni yasana, sikolasivi ni vuli kei na veivakatorocaketaki ena veikoro ena loma ni yasana. Ena dua talega na kena iwase ena curu kina Fijian Holdings me kuria na nodra ilavo vakatubu.
E dua talega na inaki ni soqo na kena vakaukauwataki na veiwekani ni veitikina kei na nodra veikilai na lewe ni yasana. Na soqo oqo era a vakadonuya na lewe ni Matabose ni Yasana ena ruku ni veiliutaki ni jemeni ni bose sa mai yali o Ratu Romanu Matanitobua.
Na yasana o Namosi e tiko kina e lima na tikina kei na 28 na koro. Ena tikina o Namosi era tiko kina na Turaga na Tui Namosi ka ono na kena koro: Namosi, Navunibau, Navuniyasitu, Narukunibua, Waivaka kei Naduruyasi. Tikina o Wainikoroiluva e lima na koro: Wainikoroiluva, Nukusere, Nakavika, Navunikabi kei Saliyadrau.
Tikina o Veinuqa e ono na koro: Nasoqo, Wainilotulevu, Korovou, Wainiyavu, Burotu kei Vunidavo. Tikina o Naqarawai tiko kina e tolu na koro: Naqarawai, Wainimakutu kei Naraiyawa.
Na Veivatuloa e walu na koro: Veivatuloa, Mau, Nabukavesi, Qilai, Navunisoco, Lobau, Namelimeli kei Nakavu.