Na qoli vakaveitalia e Namalata
Era vakaraitaka kina Siga Vou na Turaga na Ratu mai Namalata, ena vualiku kei Tailevu o Ratu Isaia Tuirakiwaimaro, ni toso cake tikoga na qoli vakaveitalia ena nodratou iqoliqoli.
Na qoli vakaveitalia era tukuna ni cala vakalawa, ka dodonu mera totogitaki ko ira era vakayacora tiko.
E tiko na sala vakavanua e dodonu mera vakamuria, ia ko ira oqo era qoli ga ka suka lesu tale mera la’ki volitaka na nodra ika.
Ko ira na qoli tiko vakaveitalia qo era tukuna era vakailawalawa tiko.
“E dua na ilawalwa era lewe ono na marama ka dua tikoga na kena turaga ka qarava vakatabakidua na nodra boto ni qoli kei na idinicavu,” era tukuna.
Era kerea na Ratu mai Namalata ke rawa ni ratou gole yani na Tabacakacaka ni Qoli ena noda vanua, mera la’ki dabe ka veivosakitaka na leqa oqo kei na kena iwali.
Na qoli vakaveitalia e yaco tiko ena veiyasai Viti kece.
Mai na yasana vakaturaga o Macuata era sa ripotetaki na dau la’ki qoli butako ka tukuni ni ra gole sara tiko yani e Viti Levu.
Ena nodra taqomaka na nodra iqoliqoli, sa tu ko ira na ovisa ni iqoliqoli. Sa tu ga na nodra waqa mera dau vakayagataka ena nodra raica na nodra iqoliqoli.
Mai na yasana o Ra e vakaraitaka na Turaga na Tui Lawa o Ratu Epeli Niudamu ni vakayacori tiko kina na qoli butako.
Ena so a vanua era tobo kina na dau qoli butako, era vesuka na boto kei na idinicavu na itaukei ni qoliqoli.