Na Wasei Vakatautauvata Ni Lisi
Na wasei vakatautauvata ni lisi e mai vakadonuya na matanitu na FijiFirst ena Janueri ni 2011, ka qai tekivuna na Tabacakacaka iTaukei, (iTaukei Lands Trust Board (TLTB) ena Jiulai ni 2015.
E vakaraitaka na iliuliu levu ni TLTB (chief executive officer – CEO) o Tevita Kuruvakadua, ni ratou sa wasea e $174 milioni ena tolu na yabaki sa oti kivei ira e lewe 51,366 na tauri lisi ka sivia na yabaki 18 mai na yavusa, mataqali kei na itokatoka ena veivula. Na TLTB e tukuna na turaga CEO ni maroroya tiko $32.5 na milioni na nodra ko ira era sega ni sa yacova na yabaki 18, ka ra lewe 39,834 na kedra levu.
“Na uma ilavo oqo ena tiko vei keitou ka na qai wasei vei ira ni ra sa yabaki 18,” e tukuna o Kuruvakadua.
E tukuna ni vei ira na 39,834 ka sega ni sa yacova na yabaki 18, e lewe 20,812 na tagane ka 19,022 na yalewa.
Na nodra ilavo oqo, e tukuna o Kuruvakadua ni na yaga vakalevu vei ira ena nodra vuli se ena veibisinisi era via vakaitavitaki ira kina.
E tukuna o Kuruvakadua ni kena sa mai wasei vakatautauvata na lisi, e sa mai oti kina na veileti ka dau vakayacori me baleta na kena dau wasei na lisi ena gauna e liu. Era sa wasei talega na marama lewe ni mataqali e dua na ka e sega ni dau yaco e liu.
Na kena sa mai wasei vakatautauvata na lisi, esa mai vakadonutaki kina nai Vola ni Kawa Bula, mera sa bokoci na mate.
“Eso na itaukei era sa mate, ia e bula tu na yacadra ena iVola Kawa Bula.”
E tiko talega eso na mataqali era sa vakadonuya vata me maroroi na nodra lisi, mera qai vakayagataka ena nodra ka ni veivakatorocaketaki.
Ko ira oqo e tukuna o Kuruvakadua ni sa tu na fomu mera vakalewena.