Tuvatuva Vou Nodra Na Marama E Veinuqa, Tailevu

Sa mai cava e dua na nodra ituvatuva ni cakacaka na Sosoqoqo Vakamarama e Veinuqa, Tailevu.

E vakaraitaka na peresitedi ni soqosoqo o qasenivuli vakacegu Siteri Vakadranu, na cakacaka ena vale ni soqo ni koro sa mai oti ka vakayagataki kina e $5000 na isolisoli mai na Minisitiri ni Marama. Na ilavo oqo e vakayagataki ena kena tara e dua na valenikuro ni Veinuqa Community Hall.

E dua na matai ka turaga mai Ra o Keresi Lutua Ramoua e vakawati ka vakaitikotiko talega e Veinuqa, e qarava na cakacaka ka sega ni saumi.

Na kena isau e tukuna o Ms Vakadranu ni ra tali ga marama ka vakacabori vua ni sa bera na kena dola.

Era dolava na valenikuro na Minisita ni Marama o Mereseini Vuniwaqa.

E vakavinavinakataki ira na marama ena vinaka ni nodra gugumatua kei na nodra veitokonitaka na kena sema na valenisoqo me vakayagataki me sa valenikuro. E kerei ira mera tosoya tiko na nodra cakacaka vinaka ka vakatalega kina na nodra qarava na nodra matavuvale. E vakaraitaka o Ms Vakadranu ni ra vakaiyayataka na valenikuro na marama ni Veinuqa era cakacaka tu.

Era volia na sitovu ni vakasaqa, na kuro, beseni, yaya ni kana kei na ibe ni valagi me vakayagataki e valenikuro,” e tukuna o Ms Vakadranu.

Na tuvatuva tale ka tarava me baleta na valenisoqo, e tukuna me vakaoti edua na yasa ni vale e tara tu vaka vo.

E tukuna ni rauta e lewe 30 era lewe ni soqosoqo tiko ia e tukuna ni tu tale eso ka ra tu ga e nakoro ia era dau veivuke ena cakacaka vakamarama e dau qaravi ena koro.

Na isoqosoqo e tukuna era lewena talega na sa qase ka ra dau vakaitavi vakalevu ena veivakasalataki kei na veivakavulici vei ira na lewe ni soqosoqo.

E vakaraitaka ni ra sa solia tale e dua na nodra ivola ni kerekere vua na marama Minisita me so tale mai na nodra iyaya ka wili kina na misini ni culacula. E vakavinavinakataka talega na matanitu o Ms Vakadranu ena veivuke e vakayacora kivei ira na marama ena noda vanua.