Tekivu na sotasota ni Ratu Sukuna Bowl
Sa tekivutaki ena noa na sotasota vakayabaki ni Mataivalu (Republic of Fiji Military Forces – RFMF) kei na Ovisa (Fiji Police Force) ka vakatokai tiko na Ratu Sukuna Bowl.
Oqo sai ka 67 ni yabaki ni sotasota oqo.
Na ibole ena yabaki oqo na, “Tarovi ni nodra vakalolomataki na Marama kei ira na Gone” ka ratou vulagi dokai lewe va na gonevuli mai nai to e rua. Ena nodratou vosa eratou kerei ira na itubutubu turaga mera dau rokovi ira na tinadra ka vakatalega kina ko ira na gone. Eratou vakavinavinakati rau na iLiuliu Levu ni Mataivalu o Rear Admiral Viliame Naupoto, kei na iLiuliu Levu ni Ovisa o Brigadier General Sitiveni Qiliho, ena nodrau digitaka na ibole ni sotasota ena yabaki oqo. Ena kena dola ena noa ena Multipurpose Court e Laucala, Suva, e matataka na iLiuilu Levu ni Ovisa na nona iVukevuke (Deputy Comissioner) o Rusiate Tudravu.
O Rusiate Tudravu ena kena tavo na sotasota ni yabaki oqo ena Queen Elizabeth’s Barracks (QEB) e Delainabua , e tukuna kina ni tikoga vakawawa vei iratou na Mataivalu na Ratu Sukuna Bowl, me vaka ni ko iratou na Ovisa eratou kena itaukei dina.
Na sotasota oqo ena qai la’ki cava ena Vakaraubuka ena nodrau na valataka na icovi cecere ni Ratu Sukuna Bowl na timi ni rakavi ni Mataivalu kei na Ovisa.
Eratou na taqomaka tiko na icovi na timi ni Mataivalu.