Marautaki Na Qaqa Ni FijiFirst

Evakaraitaka kina Siga Vou ena nona na na Turaga Taukei Waima, na Vunivalu Waima o Ratu Timoci Rokobukete, ni marautaki vakalevu na qaqa ni soqosoqo vakapolitiki na FijiFirst.

Sa vakadeitaka ko ira na dau ni veidigitaki, era tukuna ni ra vinakata na iliuliu ni FijiFirst ka Paraiminisita ni noda vanua o Voreqe Bainimarama, mera tosoya na veiliutaki dina, dodonu kei na savasava era vakayacora mai ena va na yabaki sa oti. E tukuna ni dua na veidigidigi dredre baleta ni levu sara na itaukei era tokona na SODELPA ka liutaka o Sitiveni Rabuka. “Na veivakatorocaketaki cava e qarava na SODELPA ena va na yabaki sa oti? era taroga.

Ena yasana o Naitasiri e sa vica vata na ena Minisita mai na veimatanitu sa oti, ia era tukuna na Vunivalu Waima e sega ni dua na ka ni veivakatorocaketaki e caka ena loma ni yasana.

Ena veisiko ka ra cakava na turaga Paraiminisita e Lutu, e tukuna o Ratu Timoci ni ra rogoca ena vosa ni tubetube ni ra sa solia na nodra veitokoni kina matanitu ia ni yaco na veidigidigi era digitaka na SODELPA.

“E dina ni ra vakayagataka na nodra dodonu mera digitaka o koya era vinakataka, ia e dodonu mera rai sara ki liu ka ra digitaka o koya ena rogoca na nodra tagi ena va na yabaki sa tu e matadra,” era tukuna na Vunivalu Waima. Na matanitu ni FijiFirst era tukuna ni sa kauta yani kina yasana o Naitasiri na vakalivalivataki ni veikorokoro, na gaunisala, wai ni gunu, vale ni wai, koronivuli, veivuke kivei ira na dauteitei kei na veivuke kivei ira na veikorokoro kei ira na lewenivanua.

Ra nuidei tiko ena nodra vosa na iliuliu ni FijiFirst ni n a tomana cakacaka vinaka ena va na yabaki sa tu e matada.

Veitaba : Simione Haravanua Era vakaraitaka na nodra marau na dau veitokoni ena soqosoqo ni politiki na FijiFirst ena nona mai qaqa ena veidigidigi levu ena macawa sa oti. Tucake toka e na i ka tolu mai na mawi ko Dr Iferemi Waqainabete, dua vei ira ka digitaki ena Fiji First.