Namaki Me Veisau Na Jemeni Ni Bose Ni Yasana O Naitasiri
Enamaki me na veisau na jemeni ni Bose ni Yasana o Naitasiri. Na jemeni ena gauna oqo o Alivereti Nabulivou.
E a digitaki koya na Turaga Paraiminisita ka Minisita talega ni Tabacakacaka iTaukei ena yabaki sa oti ena gauna e sa lewena tiko kina na matanitu, ia oqo e sa lewena na isoqosoqo vakapolitiki na Unity Fiji.
Na itutu ena Tabacakacaka iTaukei ka ra wili ki na na jemeni ni Bose ni Yasana, era vakailesilesi vakamatanitu ka dodonu mera tokona na matanitu e veiliutaki. O Nabulivou e a lutu na yacana ena mata digitaki ni soqosoqo vakapolitiki na FijiFirst, ka curu kina isoqosoqo na Unity Fiji me tu kina ena veidigidigi ia e druka tale.
E sa vo tale tiko e dua na Bose ni Yasana o Naitasiri ena yabaki vakailavo ni 2018 – 2019, ka nuitaki ni na qai vakayacori na bose sa na dua na kena jemeni vou.
Ena veitalanoa kei Nabulivou e vakaraitaka ni sa jemeni tikoga ni Bose ni Yasana o Naitasiri, me vaka ni sa vo tiko e rua veimama na yabaki mai na gauna e digitaki kina ena yabaki sa oti. E vakaraitaka ni nona ituvatuva ena yabaki 2019, me na tosoya cake na nona veiqaravi ena yasana o Naitasiri. E tukuna ni sa ciqoma na nona druka, ka solia na nona vakanuinui vinaka ki na FijiFirst ena nodratou na veiliutaki tale ena va na yabaki sa tu e matada.
E dua na ka ena gadreva vakalevu o Nabulivou, me sa na tara na vale ni yasana o Naitasiri e Veitalacagi e Vunidawa ena yabaki qo. Na yasana o Naitasiri e gadreva vakalevu me tara na vale vou oqo, ka redetaki me rawa ilavo mai kina.
Sa mai tao tiko ena gauna oqo e tukuna o Nabulivou na kena sainitaki na ivola ni kena tawani mai na matanitu.
“Ni sainitaki oti ga qo sa na tekivu na cakacaka.”
Na vale oqo ena taba tolu kara sa vakadonuya na kena droini na veituraga ena lomani yasana.
Ni na tara oti na vale e tukuna o Nabulivou ni na dua nai sakisaki ena loma ni yasana. E vakaraitaka na Roko Tui Naitasiri o Ifereimi Corerega ni sega ni macala tiko na siga ena vakayacori kina nai otioti ni Bose ni Yasana.
Ena ituitu vaka jemeni e tukuna ni na qai vakatulewa kina na Tabacakacaka ni iTaukei.
Na vale ni yasana vou e tukuna ni sa tu vakawawa tu ena gauna oqo ia sa vakadonuya na matabose kei ira na turaga.