Sa na macala edai na itaukei ni Sukuna Bowl

Sa oti na vakavakarau ni kena valataki na icovi cerecere e dau qitotaki ena veiyabaki na Ratu Sukuna Bowl.

Na icovi cecere oqo erau dau valataka na timi ni Ovisa kei na Mataivalu. Oqo e sai ka 67 ni yabaki ni nodrau qitotaka tiko nai covi vakamareqeti oqo.

Ko iratou na timi ni Ovisa eratou laki vakavakarau mai Nadroga ia na timi ni Mataivalu e Togalevu vei iratou na Mataivalu e Wai.

Na timi ni Ovisa e tukuna na manidia o turaga ni ovisa Perani Nakauyaca ni nodratou vakavarau e sa sega tale na iulubale kevaka eratou sega ni rawata na icovi cecere na Ratu Sukuna Bowl. Na dau ni veivakavulici ni timi o Esala Nauga, e tukuna o Perani ni sa vakarautaki iratou na timi ena kena vakatagedegede sara e cake, ena veitabana kece sara ni qito.

“Na vakavarau qo me sa na kau lesu kina na bilo kina kena itikotiko dina e Nasova,” e tukuna o Perani.

Mai Togalevu e tukuna mai kina na manidia ni timi ni Mataivalu o Elia Rokowailoa, ni na iLiuliu ni Mataivalu o Komada Viliame Naupoto, e vinakata me vakadei tikoga na bilo e na keba ena Queen Elizabeth’s Barracks (QEB). “Keitou sa na cakacaka ga e na gagadre nona na Komada,” e tukuna o Elia. O koya ena qai taukena na bilo ena qai macala ni oti na qito edaidai. Na bilo ena gauna oqo e taura tiko na timi ni Mataivalu.

Na qito ena tekivu ena ono na kaloko ena yakavi ena ANZ Stadium e Suva.

Veitaba: Simione Haravanua Eratou sa veitauriliga vata tu oqo na timi ni Ovisa ena loma donu ni rara na ANZ Stadium i Suva. Eratou na saga me ratou na kaliraka tani mai na bilo cecere na Ratu Sukuna Bowl mai vei iratou na Mataivalu ena qito edaidai ena rara na ANZ stadium e Suva.