Totoka na veibulu vei Adi Ateca
Sa mai vakayacori na veibulu vei Adi Ateca Moceiwaqa Mara Ganilau ena sautabu e Vuniduva, Somosomo, Taveuni, ena siga Vukelulu.
E vakaraitaka mai na matanivanua ni vuvale vakaturaga o Viliame Tabualevu ni dua dina na veibulu lagilagi.
“E soli mai cake na draki totoka ni veibulu vei Adi Ateca,” e tukuna o Tabualevu.
Me vaka ni ra Lotu Katolika o Adi Ateca e a sa vakayacori mada vei ira na nodra Lotu ni Tucake Tale (Resurrection Mass) ena Sacred Heart Cathedral e Suva.
E tukuna o Tabualevu ni a qai laki vakayacori tale e dua na nodra Lotu ni Tucake Tale e Wairiki ni bera na veibulu e Vuniduva. Na Lotu ni Tucake Tale e Wairiki e tukuna o Tabualevu e vakaitavi ga kina na Turaga Bete e Wairiki.
E tukuna ni oti ga na veibulu sa wase talega na magiti ni burua, ka ra sa lesu mai ki Suva ena waqa ni matanitu na
ko ira na gole yani e Viti Levu. Ko ira ka gole yani ki na veibulu e tukuna o Tabualevu ni ra lako sara mai Rewa, Nadroga kei Lau. Era sa tikoga ko ira na weka voleka ka tukuna o Tabualevu ni ra na qai veisukayaki ni sa vakayacori oti na vakabogi va.
Ko Adi Ateca e wati o Ratu Epeli Ganilau, na luvedra na Turaga Tui Cakau o Ratu Penaia Ganilau. O Ratu Penaia ka Kovana ka Peresitedi talega ni noda vanua lomani oqo ko Viti.
Ni ra sa leqa era qai veisosomitaki na Turaga na Tui Nayau o Ratu Sir Kamisese Marama na itubutubu turaga nei Adi Ateca.