Na kauwai ni Soqosoqo Vakamarama

Sa vakaraitaka ki na Siga Vou na Peresitedi ni Soqosoqo Vakamarama ena noda vanua, o Adi Finau Tabakaucoro, na kauwai ni soqosoqo ena kena sa bisinisitaki na iyau ni iTaukei.

Na noda iyau na itaukei e dau vakamareqeti, ka da kilai tani kina mai vei ira na veimata tamata tale eso era sa mai tu oqo e Viti,” era tukuna. Na iyau vei ira na marama e nodra cakacaka ni liga ka dau tu ko ira era kena dau ka ra dau qai veivakavulici ena kena caka.

Era tukuna ni sa tu talega na iyau era kila tani kina na veivanua. Ni vakarau caka e dua na solevu e sa na matata taucoko tiko na inaki kei na ka ena caka. Era sa na vakarautaka na kena iyau na marama. E tukuna o Adi Finau ni ra gole mai na marama mai na veiyasana ka ra na kauta vata na nodra iyau era cakava ga o ira.

Na isoqosoqo e tukuna e sa qai kena imatai ni soqo vakaoqo me vakarautaka.

Ni na oti na soqo, e tukuna o Adi Finau ni ratou na bose na ivakalesilesi e cake ni Soqosoqo Vakamarama me navuci kina na toso me na vakayacori.

Na inaki levu ga ni soqo era tukuna na kena vakabulabulataki na nodra cakacaka ni liga na marama kei na kena maroroi. Sa koto oqori era eso na veiqaravi vakavanua era dau vakaitavi kina na marama ka sa tu talega na iyau era dau vakarautaka me vakayagataki kina.

Oqo e vakarautaka o Naomi Koroisamanunu mai na Tabana ni Vosa kei na iTovo VakaViti ni Tabacakacaka iTaukei.

Oqo na veikidavaki vakamarama e dau caka vua e dua na marama bale. E dau caka galugalu ga na veikidavaki vakamarama oqo.

Na kena tukuci na isulu kei na iyau tale eso mai na ivana ni waqa ena gauna e vakarau udu yani kina ki na dua na vanua. Ena dau lili tiko ena ivana ni waqa e dua na tabua, ena ukutaki talega na waqa ena masi kei na ibe.

Na soqo ni kena marautaki ni yaco yani e dua na ilakolako vakaturaga, waqa vou, ilakolako ni kau matanigone, suka mai na caka were ni turaga. Era roqo tiko na iyau e vaka na masi, ibe, waiwai, katukatu isulu na marama, se dumudumu ena kau, me vaka na kuila. Ena dua na marama e taura tu e dua na tabua. E uvu na davui, ra qai veitau qalo se cici na tagane ni ilakolako, ra cicimuri ira na marama me ra yacovi ira yani, luva na iyau ra qai vakacobocobo; eso, e sega ni veitautaki, e bini ga na iyau e matadra na vulagi.

Oqo na noda kauta na kakana buta ina dua na vale tani, se kina dua na soqo. Eda na takitaki vei ira eda sema vakadra kina, vei ira na wekada, vei ira na vulagi era mai tiko ena dua tani tale na vale, ina vale ni turaga se vei ira ga eda nanuma ke sa buta e dua na kakana laurai vakavudua se vakagauna ga.

Qo e dua na gacagaca ni vakamau. E vakayagataki kina na ibe, wili kina na icoco, na vakabati, na idavodavo, na masi se gatu me kena ivakamalumu, na ilokoloko, na itaunamu ni Viti, na itaunamu ni Vavalagi, iubi ni davodavo kei na itutuvi.

Na roqoroqo e imatai ni gauna mera lai roqota, lai reguca kina na gone sucu vou o ira na marama era sema vakadra vua.

Era na kau tabua, ibe, isulu ni gone kei na iyaya tale eso me lai vakayagataka na gone.

Kilai mai Tailevu me vabogi se kevekeve, mai Lau kei Naitasiri me bikabika, mai Kadavu me vabogi, mai Yasawa me roqoroqo se bogiva.

Ena qai tomani ena mataka.