Na tiko ibure e dau caka talega na kena magiti
Ni sa tiko ibure e dua na gone se me sa sele, oqo edua na ka e dau laurai kina na nodra veivakamenemenei na itubutubu ka vaka kina ko ira na weka.
Na siga sa lokuci me sa laki tiko ibure kina ena vakarautaki na kena isulu kei na kena kakana, se iwaraki ni nona lesu mai valenibula. Ena vakarautaki na ibe vou ka so na gauna na masi talega me nona idavodavo. Ni sa bogi va edau kena ivakarau mera dau laki sili waitui me vakarawarawataka na luva ni vadreti. E dau vakarautaki talega edua na magiti ka vakatokai me Magiti ni Yavou.
Na magiti ni yavou e sega wale ga ni dau caka taudua vei ira na ulumatua tagane. Ni dua na gone tagane e se qai tiko ibure e dau ka bibi sara vei ira na wekana. Ena dau caka na kena magiti ni kana vata. Qo e dau qai caka ena gauna e vakabogi va kina. Era na vakarautaka na marama na nona isulu na cauravou ka ra na tevuka talega na nona idabedabe ni kana. Ena gauna mada ga e davo koto kina e vale era na tevuka tale ga na nona idavodavo na marama tinana. Edau laurai eke ni bula vakaitaukei e dau levu kina na veivakamenemenei. Ena levu na vanua era dau vakamenemenei ga na ulumatua ni matavuvale.
Ia, ena gauna oqo e sa kauta mai na veivakaduiduitaki me vaka ni ra sa gadreva na gone me tautauvata na veika e caka vei ira.
E dua na ka e dodonu meda nanuma tiko na nodra dodonu na gone. Na nodra dodonu na gone sa vakalawataki ka sega kina na veivakaduiduitaki ia me tautauvata na veika e vakayacori kivei ira. Na veivakamenemenei vakaoqo mera vakila na gone ni vakayacori vakatautauvata kivei ira kece e loma ni vale.