Namaka o Tawake me Curu ki na Mataivalu
Evinakata o Sekaia Tawake me curu ki na Mataivalu ni Viti (Republic of Fiji Military Force – RFMF) ka laki lewena na kena matabani, ni oti na nona tauri vola mai na Youth Training Centre e Valelevu ena siga Lotulevu.
Sa yabaki 18 o Tawake ka cavutu mai na koro Buretu mai Tailevu. Na koronivuli oqo e dau vulici kina na kena vakayagataki na ivakatagi.
E tukuna o Tawake ni dau taleitaka na ivakatagi ka sa nuidei ni nona sa tauri vola ena vuli vakatagi, sa na rawa kina vua me laki curu ena matabani ni mataivalu. Na cauravou ni Buretu qo e taura na icovi cecere duadua (Best Overall Trophy).
O Aseri Waqanisau mai Gusuisavu e Naitasiri e sa yabaki 18 talega, ka taura o koya na icovi ni gone ka toso vinaka duadua na nona vuli ena yabaki 2018.
E tukuna ni marautaka na nona sa mai tauri vola ka nuitaka me cakacaka me rawa ni sauma lesu na nona dinau.
E nodra vulagi dokai ena soqo oqo na iVukevuke ni Vunivola Tudei ni Tabagone kei na Qito, o Jone Nemani.
E tukuna ni inaki levu ni nodra laki vuli ki na Youth Training Centre me rawa ni ra vulica na ivakatagi ka mera cakacaka talega ena vuravura ni vakatagi.
E levu na gonevuli era sa mai oti na nodra vuli era sa laki kune cakacaka. Eso era sa tiko ena matabani ni mataivalu, na matabani ni ovisa, ka so era sa curu ki na Tabana ni Veivakadodonutaki. Ena gauna oqo esa tekivutaki tiko edua na matabani ni Tabana ni Veivakadodonutaki. Eso talega vei ira e tukuna o Nemani era sa tiko ena Mataivalu ni Bolatagane (British Army).