Mera Vakavulici na Tabagone Ena Cakacaka ni Liga: Ramatai

Evakaraitaka na Peresitedi ni Soqosoqo Vakamarama mai Bua o qasenivuli vakacegu Ana Ramatai, ni sa dodonu vei ira na marama mera vakadewataka na nodra kila ena cakacaka ni liga kivei ira na itabagone.

“Na ka e gadrevi vakalevu ena gauna oqo na kena vakabulai tiko na kila ka vakacakacaka ni liga ka ra kilai tani kina na noda marama ena veisayai Viti,” e tukuna o Ramatai.

Ena veiyasana vakaturaga e 14 ena noda vanua e tukuna o Ramatai, ni tu na cakacaka ni liga na marama kei na turaga e kilai tani kina. Mai na yasana vakaturaga o Bua e dua na ibe e kilai tani kina na ibe kuta. Na kuta e tukuna o Ramatai ni tu ga na vanua e bula kina.

Ena veivanua e bula kina era solia na itei kivei ira era dau kerekere yani, ka ra kena dau ena talitali. O ira oqo e tukuna era talia na veimataqali ibe ka wili kina na ubi ni kisi ni mate, ka ra volitaka.

E dua na ka sa kune tiko ena gauna oqo, ni ko ira na kila na talitali era sega ni via solia na nodra taledi baleta ni ra rawa ilavo tiko kina. Na nodra rawa ilavo e tukuna o Ramatai ni vinaka kivei ira, vakabibi ni vukea na kena laveti cake na ivakatagedegede ni nodra bula vakamatavuale ena veisiga.

Na ka e bibi tiko e kuria na kena mai yali na taledi oqo.

E na vula oqo era a bose kina na lewe 12 na isoqosoqo vakamarama ni veiysana ena valenivolavola ni Soqosoqo Vakamarama ena noda vanua e Nabua, Suva.

E tukuna na Peresitedi ni Soqosoqo Vakamarama ena noda vanua o Adi Finau Tabakaucoro, era vakavulagi ka laki tukuni kivei ira na marama na ka me baleta na draki veisau sa yacova tiko na noda vanua ena gauna oqo. E tukuna ni veika e vakayagataki ena nodra cakacaka ni liga na marama, era teivaka kei na kena caka era vakaitavi ga kina ka sega ni vakayagataki na misini me kaburaka na kubou ki na maliwa lala.

“Na nodra cakacaka ni liga e ka dina,” e tukuna o Adi Finau.

E tukuna o Adi Finau na inaki levu ni soqo oqo na kena maroroi kei na kena caka vinaka na cakacaka ni liga. Ko ira na marama era tukuna ni vinaka talega mera kila na bibi ni cakacaka ni liga, kei na vanua era vakayagataki kina ena veisoqo vakavanua.

E levu sara na iyau e mai vakaraitaki era voli ka tukuna o Adi Finau ni sa tukuni tale tikoga kivei ira na marama, na nodra na rawa ilavo mai na nodra cakacaka ni liga ia na kena maroroi na taledi kei na kena vakatavulici na taledi e bibi sara.

Ena saga na Soqosoqo Vakamarama ena noda vanua e tukuna o Adi Fnau me sa qaravi ena veiyabaki na vakaraitaki cakacaka ni liga.