Me Rokovi Tiko na Lawa ni Soko: Mataivalu e Wai

Eratou sa veivakasalataki na Mataivalu e Wai (RFMF Naval Division) kivei ira na itaukei ni waqa kei ira na pasidia mera rokova na Lawa ni Soko ni noda vanua. E tukuna na kena iliuliu o Captain (Navy) Humphrey Tawake ni da donuya tiko oqo na gauna e dau levu kina na veitosoyaki, ka levu era dau vakayagataka na waqa mera gole ki na vanua mera laki gade kina.

Na noda vanua, e tukuna o Captain (Navy) Tawake, ni sa tu na Lawa ni Soko ka dodonu mera vakamuria na itaukei ni waqa kei ira talega na pasidia. E dua na lawa ka dau basuki vakalevu o ya na sivia ni pasidia e dau vakavodoki.

Oqo e dau vakavuna vakalevu na nodra dau cike na pasidia, ia e dodonu mera kila ni veiwaqa ena noda vanua esa tu vakalawa na iwiliwili ni pasidia e dodonu me vakavodoka.

Esa tu talega na itotogi ena soli vua na kavetani ni waqa kei na kabani ni waqa ke sa voroki na lawa oqo. E tukuna o Captain (Navy) Tawake ni levu na gauna e dau yaco na leqa e wai, e dau qai yaco na veidusi se ko cei e cala.

Na Mataivalu e Wai, e tukuna na kena iluliu, ni dau tu vakarau ena loma ni 24 na auwa me na solia kina na nona veivuke ke sa mani yaco e dua na leqa e wai. Na vakasala oqo era wili talega kina ko ira na dau vakau waqa ena veikorokoro e veiyasai Viti.

E levu vei ira oqo era dau vakayagataki mera veikau kina veikorokoro, era dau gade kina na vulagi era lako yani ki Siganisucu ki na nodra koro.

Na veiwaqa oqo e tukuna o Captain (Navy) Tawake ni tiko talega na iwiliwili ni pasidia me vakavodoka.

E dodonu talega me tiko na nodra iqaloqalo na pasidia ke mani yaco e dua na leqa e wai.

Photo: Ronald Kumar E sa dau kilai tiko na oso ni wavu ena Port Mua-i-Walu e Walu Bay, Suva, ni da sa yacova mai na draki ni Siganisucu kei na tawse ni yabaki.

Photo: Ronald Kumar Na iLiuliu ni Mataivalu e wai ena noda vanua, Captain (Navy) Humphrey Tawake.