N ave ivak as al us al uta kiei va karauvou

Ena draki ni veisau sa curuma mai na noda vanua, e sa mai veisau talega kina na noda itovo vakavanua.

Ia, eda kalougata na iTaukei ni veisau oqo e sega sara ni veisautaka vakalevu na noda itovo kei na ivakarau. Ena noda veiqaravi vakavanua sa dau yaco kina na veisau me vaka na iwase ni yaqona ni yaqona vakaturaga e dau vakayagataki ga kina e dua na vuaka vavi. Ia ena dua na gauna e a vulagi dokai kina o Laisena Qarase ena kena dolavi e dua na misini vou nei Crest Chicken e Colo-i-suva e iwase ni yaqona na toa. Eso era vakayagataka na sipi me iwase ni yaqona.

E dua tale na itovo vou e curu mai ki na noda vanua na veivakasalusalutaki. Ena gauna oqo esa wiliki tiko me dua tiko na tiki ni veiqaravi vakavanua na veivakasalusalutaki ni vulagi dokai. Na vakadidike nei Naomi Koroisamanunu me baleta na itavi vakavanua era qarava na marama ka wili kina na veivakasalusalutaki e tukuna ni veivakasalusalutaki e itovo vou ena noda vanua. “Oqo e dua na ivakarau vou me vaka na kena sa mai veicurumaki na ivakarau ni bula vakaitaukei kei na nodra ivakarau ni vakarokoroko na Idia, e sa laurai ni sa ciqomi na veivakasalusalutaki me sa gacagaca tale ga ni veiqaravi vakavanua.”

E kuria ni veivakasalusalutaki sa ivakarau ni veikidavaki vakaturaga vei ira na Idia ka curu mai vakarawarawa na ivakarau oya ki na iTaukei ena gauna ni bula vakapolitiki ni matanitu veicurumaki ka a mai tekivu veiliutaki ena gauna e sa tu vakataki koya kina o Viti. E dau vakayacori na vei vakasalusalutaki ni sa dau vakarau me vakayacori e dua na soqo ni marau me vaka na solevu, na meke se na veiqaravi vakavanua era sa dau coria na marama na kena salusalu me vakabulabulataki na irairai ni soqo. Na salusalu sa ivakaraitaki ni marau ka salavata kei na kena isulu, na vesa, na liku, na sote dui roka kei na kena vinivo, na jaba kei na kena isulu.

Ena dua na kena ivakamacala ena ivola ni Bula Vakavanua ka vola o Ratu Semi Seruvakula ena tabana e 36 e tukuni kina ni ka tabu nira dau vakasalusalutaki na turaga bale mai vua e dua tale qai vakavo ga mai vua na watina se luvena. E tabu ni dua me tara na domodra se vakarubeca tale kina e dua na ka me va na salusalu.

Ke gadrevi mera vakasalusalu na noda turaga, ia e dodonu mera se daramaka rawa mai vale ni bera nira gole kina veiqaravi. E a sega talega ni dua na gacagaca ni noda veiqaravi vakavanua na veivakasalusalutaki.

Sa tu talega na salusalu era kilai tani kina a veivanua me vaka na sisi ni Lakeba se na salusalu vono ni Kadavu.

Veitaba: CTA E ratou vakasalusalutaki na vulagi dokai ena dua na bose (mai na yasana imawi), o Christoph Wagner, European Delegation for the Pacific, o Howard Politini, na iliuliu ni Pacific Islands Private Sector Organisation kei Sakiusa Tubuna, na iliuliu levu ni IFAD Pacific.