VAKURI NA VULI NI SAUSAUVOU E NADROGA
Sa vakuria tiko na Tabacakacaka ni iTaukei ena gauna oqo na vuli ni sausauvou ena yasana vakaturaga o Nadroga/ Navosa.
E vakadeitaka mai na itukutuku oqo ki na Siga Vou na Roko Tui Nadroga, o Semi Kuru. Sa vakadeitaka mai na Tabacakaca ni iTaukei ni vuli oqo sa vakayacori oti, ia e sega ni vakaoti. Esa na vakayacori taucoko kivei ira na lutu tiko.
Na vuli oqo ka tekivutaki ena vula o Noveba ena yabaki 2017, mai na yasana o Tailevu kei Rewa. Ena vula ko Okotova ena yabaki oqo, e a vakayacori mai Nadave na nodra vuli na sausauvou mai na yasana o Ba.
Na vuli oqo e kena inaki levu duadua mera vakararamataki na sucuturaga, veivuvale veiliutaki vakavanua kei ira na sauturaga ena noda veidelaniyavu ena bibi ni kena maroroi tiko na veitikotiko vakaturaga, ka yavutaki ena veiliutaki vinaka, ka matau.
E tukuna o Kuru kina Siga Vou, ni vuli oqo e veivuke sara vakalevu kina kena digitaki o koya me veiliutaki ena dua na koro, tikina se yasana.
Na veiliutaki vakaturaga, edua na ka edau veibataki vakalevu, ia na vuli oqo e veivakararamataki ena kena digitaki o koya me veiliutaki. Mai Nadroga, e tukuna na Roko Tui sa veivuke sara vakalevu na vuli oqo ni ra dau dabe na mataqali turaga me ra veivosaki ka vakadonui o koya me veiliutaki. Me baleta na itutu vakaturaga Na Ka Levu e tukuna ni ratou na qai veivosakitaka ga ko iratou ka nodratou na ituitu vakaturaga oqo. Ena soqo ni Siga kei Nadroga e sa qai vakayacori oti ga oqo, era a dolava na Turaga Na Ka Levu ena $50,000, ia me vaka ni se bera ni buli e dua, eratou a mai tausoli ga na mataqali turaga e Cuvu.