Na bibi ni kena yadravi na iqoliqoli
Era marautaka mai na yasana o Serua na totolo ni kena vakayacora na Tabacakacaka ni iTaukei na ka era kerea. Ena iotioti ni Bose ni Yasana ena vula ga oqo ena i ka ono ni siga mai Navua, era a kerea kina me dua na vuli vei ira na dau yadrava na iqoliqoli ena veikoro ena yasana. Na qoli butako e Serua sa sivia ka sa sega ni rawa ni ra tarovi. E tukuni ena bose ni so ga vei ira na dauqoli era vakalaiseni ka so e sega. E tukuna na Roko Tui Serua o Seru Ratukalou ni dua tale na kauwai e tiko ni so na vanua vakatabui era sa qoliva tiko na dauqoli era gole yani e taudaku. Na nodra vakatabuya na kena qolivi eso na iqoliqoli e tiko na vuna ka ra rokova na lewenivanua, e tukuna na Roko Tui Serua.
Vei ira na lewe ni yasana o Serua e tu vei ira na loloma, veikauwaitaki ka ra dau veiraici.
Na nodra iqoliqoli sa ivurevure ni kakana kivei ira ka ra dautaqomaka, ka vakamareqeta. Ia, kivei ira na dauqoli era sega ni kauwaitaka se nanuma na iqoliqoli nira qoliva kece na ka era tu kina mera laki volitaka.
Na nodra kauwaitaka na nodra iqoliqoli era kerea kina na veivuke ni Tabacakacaka ni Qoli.
E qai vakayacora e dua na nodra vuli na ovisa ni qoliqoli na Tabacakacaka ni Qoli ena yanuyanu o Yanuca, ka ra tiko kina e lewe 21 mai na lima na koro ena yasana. Na vuli oqo e kovuta kece na veika e cala vaka lawa e vakayacori tiko ena iqoliqoli.
Ena nona sikovi ira na Vunivola Tudei Vakatawa ni Tabacakacaka ni Qoli o Naipote Katonitabua, e tukuna vei ira na bibi ni nodra itavi. Ena nodra vuli sa vakamatatataki kina vei ira na Lawa ni Qoli ni noda vanua. Sa dodonu mera kila e kuria na nodra itavi ena kena yadravi na nodra iqoliqoli. E tukuna ni ra sa na matana ka daligadra na Tabacakacakaka sa nuitaka ni ra qarava vakavinaka na nodra itavi.
Sa vakamasuti ira mera kakua ni vakatanitaka na nodra vakayagataka na kaukauwa e solia vei ira na lawa, ka mera rokovi na dauqoli era sa cala.
E tukuna ni sa vakayagataki vakalevu na wasawasa ena kena veikauyaki na waigaga ni veivakamatenitaki, ka oqo talega e dua na ka mera na yadrava matua.
Sa tiko na veivosaki kei iratou na Tabacakaca ni Ovisa kei na Mataivalu e Wai mera na solia na veivuke ke gadrevi.
Na vuli oqo e tukuna na Roko Tui Serua ni ra sa qai kila kina na ovisa ni qoliqoli na bibi ni nodra itavi. Era vakadinadinataka ni levu na veika e cala vaka lawa e vakayacori tiko ena iqoliqoli ena loma ni yasana.