Nuitaki mera Galala na Lewenikoro ena Kumuni Lavo
Na matanitu ka veiqaravi tiko ena gauna oqo, e dua tiko na nodratou ituvatuva ena kena vakavinakataki na veilakoyaki ki na veiyanuyanu. Oqo e wili kina na kena taqomaki na nodra dodonu na pasidia. Na Minisita ka qarava na veilakoyaki, o Jone Usamate, e tukuna ki na tabana ni tukutuku, na kauwai me baleta na leqa era sotava na lewenivanua ka ra via gole ki na na nodra veiyanuyanu, mera laki marautaka kina na Siga ni Sucu (Christmas) kei na Tawase ni Yabaki (New Year) ena yabaki oqo.
Ena macawa sa oti e dua na pasidia ni dua na waqa me gole ki Vanua Levu, e qiritaka mai ki na Siga Vou ni laki ca na idini ka ra mai veiciriyaki voli e wasawasa.
Sa laki yakavi e baci qiri tale mai na pasidia oqo me tukuna era sa qai mai vakasoburi tale ni oti e walu se tini na auwa na nodra ciri tu.
Oqo na mataqali leqa e kauwaitaka na matanitu me vaka ni ra vakaloloma kina na pasidia. Na matanitu e sa voli waqa tale ka sa tiko ena gauna oqo e va na nona waqa, ka vakayagataki talega ena nodra kau na pasidia kei na usa iyaya ki na veiyanuyanu. E levu talega na pasidia era gadreva mera vodoka na waqa ni matanitu baleta e vinaka na nodra veiqaravi.
Ena gauna oqo na Tabana ni Soko (Maritime Safety Authority of Fiji – MSAF) e qarava tikoga na nona itavi ena kena laurai me vakamuri vakavinaka na Lawa ni Soko ni noda vanua.
E levu vei ira ka ra gole ki na nodra veiyanuyanu era na lesu tale mai ki Viti Levu, mera na mai cakacaka ni oti ga na marautaki ni Tawase ni Yabaki.
Oqo ena dua na gauna ena osooso kina na vei kabani ni waqa ena nodra laki vakaleleci mai na nodra pasidia kei ira tale era na kauti ira mai na gonevuli, mera mai vakarautaki ena dola ni vuli enai ka 14 ni Janueri ena yabaki mai oqo (2019).