Nuitaki me galala na lewenikoro ena kumuni lavo
Sa nodratou ituvatuva na lewe ni komiti ni Navuso Village Trust mera vakagalalataki na lewenikoro ena soli lavo kina veisoqosoqo me vaka na lotu, vuli kei na veivakatorocaketaki. Na ituvatuva qo e tukuna na jemeni ni komiti, o Uraia Tutini,ni sa dodonu mera vakila na lewenikoro ena tolu se vana yabaki ka tu mai. Na inaki levu ni tuvatuva oqo mera sa qarava ga vakatabakidua na itubutubu ni nodra matavuvale. Na veisoli lavaki se kena qarai na ilavo e tukuna me sa nodratou vakatabakidua na Navuso VillageTrust.
Na komiti e sa tekivu vaqara ilavo mai ena tolu na yabaki sa oti.
E na ka 22 ni siga ni vula o Tiseba e a qaravi kina e dua na soqo ni kumuni lavo, ena koro vakaturaga o Navuso ka tukuna o Tutini nira soli kina vakamataqali.
Na soqo oqo eratou cicivaka na komiti ni veivakatorocaketaki ni koro ka liutaka tiko o Josua Saumaiwai III. Era lewe 20 na lewe ni komiti ka lewe lima mai na veimataqali –Matanikutu, Naivisere, Matasau, Rokotarotaro, Korowaiwai kei Naisaki. Na nodra soli na vasu e $12,161. E a qai tubera e dua na kamunaga kivei ira o Waisea Sewabu mera vakavinavinakataki ena nodra cau ki na veivakatorocaketaki me baleta na koro. Na ilavo kece e kumuni e tukuna o Tutini ena vakacurumi kina tobu ni lavo ni veivuke.E gadreva o Tutini me veika kece vakailavo ni koro me ratou sa qarava vakatabakidua.
Mei kuri ni qarai ni lavo sa tiko eso na kabani – ThreeY Investment Ltd ka qarava vakatabakidua na Land Investment and Transport ni koro.
E tukuna o Tutini ni sa doodnu me ciqomi na veisau e sa yaco tiko mai ka ratou sa tu vakarau mera vukei na lewenikoro.
Na itosotoso vou era sa tekivutaka na lewenikoro vakaturaga o Navuso e Naitasiri, e tukuna o Tutini ni rawa mera vakamurimuria na veikoro tale eso ena noda vanua kevaka era vinakata.