Tu vakarau na Turaga Paraiminisita me veivuke
Ena nodra itukutuku tabaki ka kaburaki ki na noda vanua na Turaga Paraiminisita o Voreqe Bainimarama, era vakadeitaka kina ni ra sa tu vakarau me vukei ira na lewenivanua.
Era vakavinavinakataka na nodra sa digitaki tale vata kei na nodra matanitu me veiliutaki tale ni oti na veidigidigi ena 2018. Na veidigidigi, era tukuna ni ra vakayagataka na lewenivanua na nodra dodonu, mera digitaka na matanitu era vinakata me veiliutaki.
Era kuria, ni dina eso era a sega ni digitaka na FijiFirst, ia na nodra veiqaravi ena tara kece na lewenivanua ka na sega kina na veivakaduiduitaki.
“Ena sega ni dua ena guilecavi,” era tukuna.
E levu na veika vinaka e vakayacora na matanitu ena yabaki 2018 ka wili kina na kena tubu na bula vakailavo ni noda vanua, na kena vakadonui na iTuvatuva ni Lavo ni yabaki oqo, ka vakarautaki me baleta na lewenivanua kei na kena tauyavutaki na Walesi.
Na veivuke kina lewenivanua ka ra vakaleqai ena cagilaba o Gita, Josie kei Keni e kauta mai na duavata .
E levu na veivanua era tukuna sa yacovi ira na livaliva, na gaunisala, na wavu vou, na veiqaravi ni Tabana ni Bula ena kena dola na nodra Vale ni Wai (Health Centre), koronivuli kei na kena sa yacovi ira yani na veiqaravi vakamatanitu.
Na veiqaravi oqo era tukuna ni cakava na matanitu me baleti ira vakatabakidua na lewenivanua. Era tukuna ni tuvatuva ni matanitu oqo e baleta na kena buli e dua na Viti vou.
Na yabaki 2019 era tukuna ni levu na veika ena vakayacori kina ka na vakavinakataka na bula ni lewenivanua ena veisiga.
Era nuitaka ni na tokoni na matanitu kei na nona ituvatuva ena yabaki 2019 ka me na yaco me na dua na yabaki vinaka.