Suruta na vusi na tatadra nei Livai Bulamaibau
Sa mai suruta na vusi na tatadra nei Livai Bulamaibau me tara e dua na nona vale vou ena nona koro ni vasu e Qarani, Gau. Me vaka ni sega ni bula vinaka na yaqona mai Qarani, e a laki tiko mai Nawaikama me laki tei yaqona kina.
E tukuna mai kina Siga Vou o Kelepi Delai na mata ni tikina o Sawaieke kina Bose ni Yasana o Lomaiviti, ni o Bulamaibau e dua vei iratou na yali tiko e wasawasa ena gauna oqo.
Na nona loga ni yaqona, e tukuna o Delai me sa na cavu ena yabaki oqo, me volitaki ka voli kina na nona iyaya ni vale me tara mai Qarani. E tukuna o Delai ni ra vukei Bulamaibau e Nawaikama ena nona lewena e dua na ilawalawa ni solesolevaki, ka ra tea na nona yaqona. Era tea e dua na loga ni yaqona levu ka tukuna o Delai ni sa dodonu me cavu ena yabaki oqo. E tukuna ni sa mai suruta na vusi na nona tatadra ena nona laki lewena na ilawalawa lewe vitu ka ra via laki voli yaqona ni valagi ki Levuka, Ovalau.
Ko Bulamaibau, e tukuna o Delai ni dua na dau cakacaka ka ra lolositaki koya kei ira na lewe ono era yali tiko ena gauna oqo.
Na nona yaqona e tukuna ni ratou na qai lewa na itaukei ni qele na kena cavu.
Eratou biubiu e Nawaikama ni oti na nodratou gunu yaqona ni vavalagi ka ratou a via laki volia tale mai eso mai Levuka. E tukuna o Delai ni sa sega mai Levuka, eratou sa qai gole ki Viti Levu, me laki voli mai na yaqona ni valagi ena dua na sitoa ka dau volitaki yaqona ni valagi ena bati ni wai e Nakelo.
Na Mataivalu e Wai sa cegu na nodratou vaqaqara e wai, ia e sa toso tikoga na nodratou vaqaqara na Ovisa.