Oti na vakabauta ni ratou se bula na lewe vitu
Sa oti na nodra vakabauta mai Nawaikama, Gau ni ratou sa bula tiko na lewe vitu ka ratou yali tiko e wasawasa ena gauna oqo.
E vakaraitaka mai kina Siga Vou na mata ni tikina o Sawaike kina na Bose ni Yasana o Lomaiviti o Kelepi Delai, ni ratou sa kauta yani na ovisa nai taba ni waqa ka ratou sa vakadinadinataka ni waqa dina oya eratou a vodoka tiko. E tukuna talega ni rua na siqileti e kune erau a daramaka tiko erau lewe rua vei iratou na lewe vitu.
“Na siqileti karakarawa e a daramaka tiko o Filimoni Tuisinu ka dara tiko na siqileti vulavula o Livai Bulimaibau,” e tukuna o Delai.
E tukuna o Delai ni oti ga erua na siga ni nodratou yali tiko, e dua na ilawalawa e gole mai Suva ki Nairai, era raica na boto ia era mani sega sara ni via kauwaitaka ni ra vakabauta e ciri tu ga. “Me yacova mai ni kua sa siga ciwa na nodratou yali tiko,”e tukuna o Delai.
Vei keitou e Nawaikama e tukuna o Delai ni sa tevuki na ibe, ka dodonu me kedratou isole, na lewe lima na lewe ni koro ka ratou yali tiko ena dela ni nodratou vale.
E Nawaikama e yali tiko o Filimoni Tuisinu, Adriu George, Alipate Ross, Ananaisa Koroi kei Navitalai Bale. O rau tale na lewe rua o Livai Bulimaibau kei Josevata Boletakeu. Na kakana se burua me baleti iratou na lewe lima ka yali tiko oqo, e tukuna o Delai ena qai vakayacori ni ra lesu na vulagi era na lako yani ki Siga ni Sucu kei na tawase yabaki.
E tukuna o Delai ni tubutubu nei Filimoni na turaga na Vaka o Etuate Tuisinu, e sa dei tiko na nona vakabauta ni sa bula tiko na luvena ka gone duadua.
Sa toso tu ga na masumasu me baleti iratou yali tiko qo, ka sa waraki ga na Tabana ni Ovisa me laki vakadeitaka yani ni ratou sa mate dina. E tukuna o turaga ni ovisa (ACP) Maretino Qiolevu ni ratou waraka tiko eso tale na ivakadinadina, me vakadeitaka ni ratou sa mate dina na yali tiko ena gauna oqo.