Turaga dau Veinanumi o Bainimarama: Talatala Saqa
Eratou dau volia na keitou kakana ka levu tale na veivuke eratou dau cakava kivei au kei na lotu Lepani Saqa Talatala ena Tabacakacaka o Kiuva
Na iTalatala ena Tabacakacaka o Kiuva o Lepani Saqa, sa lesi ki na tabacakacaka o Valelevu ena ilesilesi vou ni Lotu Wesele ena noda vanua. E tukuna kina Siga Vou o Talatala (Reverend – Rev) Saqa ni a lesi ki Kiuva ena yabaki 2014, oqo talega na yabaki era a digitaki kina o Josaia Bainimarama me sa Paraiminisita ni noda vanua.
Ni sa bera ni lesi ki Kiuva, e a veiqaravi tiko mai Daviqele Nabukelevu, Kadavu.
E tukuna o koya ni nona yaco yani ki Kiuva ena nona ilesilesi, e kurabui ni ratou a waraki koya tu mai na turaga Paraiminista kei na nodra matavuvale.
Nai yaloyalo ni veikauwaitaki kei na loloma e raica o koya ena siga koya mai na matavuvale vakaturaga qo, e tukuna, e sega vakadua ni veisau me yacova na nona mai lesi oqo ki Valelevu. “Eratou dau volia na keitou kakana ka levu tale na veivuke eratou dau cakava kivei au kei na lotu,” e tukuna o Talatala Saqa. E tukuna, e dua na turaga dau loloma na Turaga Paraiminista ka matanataka ena veigauna.
Ni tiko mai Kiuva, e qaravi talega na koro o Muana-i-ra ka qarava e lewe 400 vakacaca na ivavakoso. E tukuna ni marautaka na nona veiqaravi mai Kiuva kei Muanai-ra baleta ni ra veitokoni na lewenivanua.
E nanoa, era sa kauti Talatala Saqa mai ki Valelevu ko ira mai Kiuva kei Muana-i-ra.
Ko iratou na matavuvale voleka nei Talatala Saqa mai Levuka e tukuna o Asaeli Kida ni ratou a veitomani mai. E vakavinavinakataki ira mai Kiuva kei Muana-i-ra o Kida ena nodra dau veitokoni vei Talatala Saqa ena nona a veiqaravi tu mai kea.
Sa yabaki 56 o Talatala Saqa, e vakawati ki Naikeleyaga mai Kabara, ka vitu na luvena