Vinakati na iTukutuku Vakailavo ni Veikoronivuli ena 2018: Minisita
Sa vakamasuti ira na komiti ni veikoronivuli na Minisita ni Vuli, o Rosy Akbar mera vakayacora na nodra Bose ni Yabaki (Annual General Meeting – AGM) ni sa bera nai ka 31 ni ena vula ko Maji.
Na kena macala me qai vakau yani ki na Tabacakacaka ni Vuli vata kei na itukutuku vakailavo ni yabaki sa oti.
Ena gadrevi nai tukutuku ni bose, e tukuna na Minisita, me rawa ni soli yani ki na veikoronivuli na ilavo ni veivuke ni matanitu. Era sa kerei na komiti mera vakayagataka vakavinaka na ilavo ni veivuke e soli yani kivei ira. E kerei ira talega na komiti ni veikoronivuli ni lotu kei ira na veikoronivuli ni komiti tale eso, mera cakacaka vata kei ira na iliuliu ni koronivuli era sa lesi vou yani. Ena cakacaka vata kei ira na Tabacakacaka ni Vuli ena kena sagai mera vakavulici vinaka na gone. Sa na dolava tikoga na katuba ni nona veivosaki kei ira ena kena sagai me rawa na takete ena 2019. Era sa vakasalataki talega na itubutubu mera vakarautaki ira vinaka na luvedra ena itekivu ni vuli ena yabaki oqo. Me taucoko na nodra iyaya ni vuli, ka me nanumi dei ni dodonu me voli kece na nodra isulu na curu e bure e gadrevi mai na koronivuli era na laki curu kina.
Na koronivuli e sa na vakarautaka na nodra ivola ni lesoni (textbooks) ka na soli wale kivei ira.
E tukuna na Minisita ni Vuli ni sa vakarau tekivu na vuli ena yabaki oqo, e vakavinavinakataki ira na qasenivuli kei na gonevuli ena veika era rawata ena yabaki sa oti, ka nuitaka ni ra na tosoya cake na nodra cakacaka ena yabaki oqo. E vakavinavinakataki ira na veikoronivuli ena veika era rawata ena yabaki 2018.
Ena yabaki vakavuli ni 2019, nai matai kei na ikarua ni wasewase ni vuli erau na ya 14 na macawa, ia enai katolu, ena 13 walega na macawa.
Na sucu kei na “Weet-Bix” e vakadeitaka ni na soli tale ena yabaki oqo.
Ena cakacaka ni veivakacokotaki me baleta na cagilaba o Winston, e tukuna na Minisita, ni sa na oti na cakacaka ena 11 na koronivuli ena Maji ena yabaki oqo.
Kivei ira tale eso na koronivuli ena toso tikoga na cakacaka e sa vakayacori tiko.