Tiko vua na Dina kei na yalo ni Veivakaturagataki, e kaya o Vitukalulu

Era vakaisaisataka na lewe ni Mataivalu ni noda vanua na dina kei na yalo ni veivakaturagataki e dau tu vua na nodra itokani sa mai yali o Turaganivalu (Major) Vilikesa Waqatairewa.

Ena vosa ni veivakacaucautaki ni Mataivalu e tauca o Turaganivalu (Major) Sanaila Vitukalulu ena lotu ni veibulu mai Vatoa, Bau, Tailevu, e tukuna ni ko Waqatairewa e bulataka na yalo ni veidokai kei na veivakaturagataki ena veisiga.

“E turaga dau cakacaka ka ra dau nuitaki koya vakalevu na veiliutaki ena tabana cava ga vakaivalu e veiqaravi kina, ka vuqa na nona ivakarau vinaka e kani vuli vei kemami, ka sa na kena idivi voli ena veisiga ni mataka,” e tukuna o Vitukalulu.

Ko Waqatairewa, e tukuna o Vitukalulu, ni a curu kina matavalu ena gauna esa qai yabaki 17 kina enai ka 3 ni Me 1975, ni sa qai biu vuli ga mai Matavatucou, ka lewena na Mataivalu Mataisau. Ena gauna e se lewena voli kina na Rural Development Unit, sa tekivu wanonovi koya matua na nona veiliutaki ni ra raica na nona maqosa kei na totoka ni nona veiqaravi.

Ena 1979 e tosoicake me sa Lance Corporal (LPCL) ka digitaki me laki tomana na nona vuli ena koronivuli na School of Military Engineering mai Linton, Niusiladi. Ena 1982 e tosoicake me sa Kovula (CPL) ka bole talega me gole ena kena yadravi na veisaututaki mai Ijipita. Ena lako oqo, e sevu kina ni gone ni Viti me lewena na Multinational Forces & Observers na soqosoqo vakaturi me raica na kena yadravi na veidinadinati se Peace Treaty vei Ijipita kei Isireli. Ena 1986 e a gole ena veikacivi me laki yadravi na veisaututaki e Lepanoni ka laki cakacaka ena United Nations Interim Force e Lepanoni, na soqosoqo ka vakaturi me yadrava na veidinadinati se Peace Treaty me baleti rau o Lepanoni kei Isireli.

Ni lesu mai, e a mai tomana na nona veivakavulici ena Trade Training School ka digitaki me laki vuli Demolitions ki Niusiladi ena 1987. Ni oti na nona vuli ena 1988 e tosoicake me sa satini ena Seviteba ka tosoicake tale ena vula ko Tiseba me sa Warrant Officer Classs II (WOII).

E curu ki na matavuvale vakaturaganivalu ena yabaki 1989 ni sa tosoicake na nona itutu me sa Liuetanant ka lesu ki Sainiai me laki taura na itutu vaka kovana (Adjutant). Ena 1990, e tosoicake na nona itutu kina Kavetani (Captain) ka digitaki sara me laki Personal Officer vua na nona iliuliu mai Lepanoni ka Komada vakacegu o Ratu Epeli Ganilau. E qarava voli na nona cakacaka vaka Personal Officer ni bera ni mai digitaki me gole ena ilakolako ni veisaututaki ena mataivalu cokovata ka veiqaravi e Iraki na Kuwait United Nations Iraq–Kuwait Observation Mission (UNIKOM) mai na 1992 kina 1993.

Ni lesu mai, e a mai tomana tale na nona veiqaravi vaka Personal Officer me yacova na 1996.

Ena vula o Noveba 1996, e a digitaki me sa liutaka na (Officer Commanding – OC) ni 2 Construction Squadron. E a laki tosoya na nona vuli ki Ositerelia ena Regimental Officers Advance Course ka cecebuya sara kina na drotini ni Mataivalu ni Viti.

Ni oti mai na vuli, e a digitaki me lesu ki Lepanoni me laki liuliu (Officer Commanding – OC) ni Alpha Company ena iMatai ni Mataivalu ka veiqaravi ena ruku ni United Nations Interim Force in Lebanon (UNIFIL) mai na 1997 – 1998.

E a mai soli vua na itutu vaka Operations Officer ni Engineering Regiment ni bera ni gole ki Bouganiville, Solomoni me laki Military Liaison Officer ena Peacekeeping Group. E tosoicake na nona itutu kina Major ena 2005. Ni cegu mai na mataivalu ena Janueri 2013 e a laki tomana na nona veiqaravi ena valenivolavola ni Paraiminisita ni lesu mai Timor Leste ena 2013.

E turaga dau cakacaka ka ra dau nuitaki koya vakalevu na veiliutaki ena tabana cava ga vakaivalu e veiqaravi kina, ka vuqa na nona ivakarau vinaka e kani vuli vei kemami, ka sa na kena idivi voli ena veisiga ni mataka Sanaila Vitukalulu Turaganivalu ena Mataivalu ni Viti