Ni Vuli Vakaukauwa: Turaga Paraiminisita
Sa vakauqeti ira na gonevuli na Turaga Paraiminisita o Voreqe Bainimarama, mera vuli vakaukauwa ena kena sa mai tekivu tale na yabaki vakavuli ni 2019 e nanoa.
Era kidavaki ira na Kalasi 1 ena nodra sa qai curuma yani na vuli ena paraimari.
Na nomuni tatadra se levu se lailai era tukuna ni tekivutaki ga ena vuli.
Era tukuna ni ra vakabauta ni nona veivuke na matanitu ena vuli, edua na veivakatorocaketaki levu ka vinaka e qarava. Na matanitu era tukuna ena nona vakaliuca na vuli, e soli kina e dua na bilioni na dola kina Tabacakacaka ni Vuli me baleta vakatabakidua na vuli ena yabaki oqo. Era vakananumi ira na gonevuli ni dodonu mera kila tiko ni ko ira na itubutubu, na dau ni veisusu kei ira na wekadra era solia na nodra veitokoni ni na vuavua vinaka na nodra vuli. “Keimami vakabauti kemuni ni koni na qarava vinaka na nomuni vuli, ka veivuke kina matavuvale kei na vanua ena veigauna mai muri,” era tukuna
Era vakasalataki ira mera vakarorogo kivei ira na nodra qasenivuli ka lomani ira era kalasi vata. Na matanitu era tukuna ni sa vakayacora na nona itavi ena nona sauma na icurucuru ni vuli, ivodovodo ni basi kei na levu tale na veivuke, ka sega ni ra bau cakava na veimatanitu sa oti.
Era sa solia na nodra vakanuinui vinaka vei ira kece na gonevuli ka namaka ni mai muri era na vuniwai, loya, qasenivuli, nasi, dau teitei kei na levu tale na cakacaka era na digitaka.
Mera nanuma dei tikoga, era tukuna, ni nodra vinaka ena gauna mai muri ena vakatau ki na nodra qarava vinaka na nodra vuli.