Meda sa Yadra na Kawa iTaukei, e kaya o Ratu Jope Buaserau
Evakaraitaka ki na Siga Vou o Ratu Jope Batilekaleka Buaserau mai na koro vakaturaga o Nabukavesi ena yasana o Namosi, ni sa dodonu meda sa yadra na kawa iTaukei. Na vuna, e tukuna ni matanitu nona na Paraiminisita o Voreqe Bainimarama e sa solia tu na veivuke me vakatorocaketaki kina na bula ni kawa iTaukei, vakabibi ena kena qaravi na qele.
E dua na iwase ni lavo levu, e tukuna, sa wasea tu na matanitu vinaka oqo, me baleta vakatabakidua na kena vakatorocaketaki na qele ni iTaukei.
Ena nodra dolava na valenivolavola ni Tabacakacaka iTaukei mai Nausori na Turaga Paraiminisita o Voreqe Bainimarama e yabaki sa oti, era tukuna kina ni veisoliyaka tiko ilavo mai na Seed Fund Grant Initiative kivei ira era kerea yani, mera vukei kina na iTaukei ni qele ena vakavure bisinisi ena nodra qele, ia ena vukea talega na kena tarai cake na vaqaqacotaki ni teivaki ni kakana ka sa ivurevure ni cakacaka.
E tukuna o Ratu Jope ni oqo e dua na veivuke e sa tu, ia me kerei, ni sa soli, me vakayagataki sara vakavinaka.
Na veimatanitu sa oti era dau veivuke ia e vaka e vakatabakidua kivei ira ga eso. Ia na matanitu oqo, e sega kina na veivakaduiduitaki ka tautauvata na veivuke kivei keda kece na iTaukei.
E dua tale na leqa kina kawa iTaukei, e tukuna o Ratu Jope na nodra dau vesumonataki mai vei ira eso.
“Na koro ko Nabukavesi e a vakaitavi ena sogo sala na 2000 ka vu mai ena vesumona kei na sasaga butobuto ka a vakayacori ena 2000 ka curumi kina na Palimedi me rawa kina na lomadra e so. E dodonu meda kua ni guilecava vakarawarawa na ka e mai yaco. “Keitou a sogota na gaunisala e Nabukavesi ka ra gole e levu na cauravou mera gole ki na Palimedi.” Ia qo na itukutuku me sa vakanadakui me vaka ni ra laki vakacabora na nodra matanigasau ki na Keba ni Mataivalu e Nabua, ka ra solia na nodra veitokoni kece kina matanitu.
“Sa gauna me veisau kina na noda rai na lewe ni vanua ka cakacakataki na qele. Ena maumau na gaunisala vinaka kei na veivuke kece e solia matanitu ke da moce tiko ga na kawa iTaukei,” e tukuna o Ratu Jope.
E tukuna ni gauna sa sogota kina o Namosi me gole yani na Marama Sipika me laki sotavi ira na lewenivanua ka vakamacalataka vei ira na itavi ni Sipika kina noda vanua, ko Nabukavesi duadua e qai dolava na na katuba.
Oqo, e tukuna, e vakaraitaka tiko na nodra veitokoni vua na Turaga Paraiminisita kei na nodra matanitu. Ena gauna era rogoca kina ni ra tauvimate tiko na Turaga Paraiminisita, e tukuna o Ratu Jope, ni laki nunuvi mai na kedra ika mera mai gunu waibuta kei na kena dalo me rawa ni vakaukauwa taki ira mera tomana tale kina na nodra veiqaravi vinaka.
E tukuna o Ratu Jope ni ra vakavinavinaka ni sa vakadonua tiko na matanitu me vakavinakataka na wai ni gunu ni koro kei na koronivuli na Ro Camaisala.
Era sa veisureti tale tikoga e Nabukavesi vua na iLiuliu ni Matanitu mera laki marautaka vata na qaqa ni FijiFirst ena gauna ena dola kina na rara ni qito na Ro Batilekaleka Ground e Nabukavesi.
Sa gauna me veisau kina na noda rai na lewe ni vanua ka cakacakataki na qele. Ena maumau na gaunisala vinaka kei na veivuke kece e solia matanitu ke da moce tiko ga na kawa iTaukei Ratu Jope Buaserau Nabukavesi, Namosi