Na Porokaramu Vou ni Veivakararamataki
Sa dua na nodratou porokaramu vou na Tabacakacaka iTaukei ka ratou vakatoka tiko na “Veivakararamataki”. E vakadeitaka mai oqo ki na Siga Vou nai Vukevuke ni Vunivola Tudei ni Tabacakacaka iTaukei o Saimoni Waibuta.
Na isevu ni porokaramu vou oqo e tekivutaki mai na yanuyanu o Serua. E tukuna o Waibuta ni a gole mai e dua na kerekere mai Serua me dua mada yani na veivakararamataki kivei iratou. Na porokaramu oqo e laki vakamatatataki kina kivei ira na lewe ni vanua na nodra itavi.
Ni qai sucu mai edua na iTaukei, e lewena e dua na itokatoka, mataqali kei na yavusa ka tu talega na noda itavi me qarava.
E tukuna o Waibuta ni veivakararamataki oqo ena vinakati kina mera dui kila na lewenivanua na nodra itavi.
Mera kila taumada na nodra mataqali, sa na qai vakamacalataki nai tavi ni nodra mataqali ki na nodra yavusa se koro.
Sa vakilai ena veikoro ni sa vaka e curusese na itovo ni sa sega ni kilai na nodra itavi.
Veimataqali
Na veimataqali – Turaga, Sauturaga, Bete, Matanivanua, Bati, Gonedau kei Mataisau era sa dui tu vata kei na kena itavi.
E tukuna ni vuli ni veivakararamataki ena vakamayautaka na veitutu kece oqo ka sa kilai tale tikoga ni so na lewe ni mataqali oqo era sa kawaboko.
Sa isevu ni porokaramu oqo na yasana vakaturaga o Serua.
E tukuna ni ra marautaka sara vakalevu na porokaramu na lewenivanua. Era lewena na ilakolako na iliuliu ni Veitarogi Vanua, na ivakalesilesi mai na Tabana ni Qoli, Tabana ni Veikau, Tabacakacaka ni Qele Maroroi, Tabana ni Bula, Roko Tui Serua kei na Provincial Administrator e Serua.
Ko ira na ivakalesilesi mai na veitabana oqo era a laki vakaitavi talega e Serua.