Vakarau soli na waqa kei na idinicavu ki Ucunivanua, Verata

Era sa marau tiko na lewenikoro vakaturaga e Ucunivanua, Verata, ni sa na vakarau soli yani kivei iratou na nodratou waqa kei na idinicavu.

E tukuna na gusu ni vosa ni koro, o Ratu Sevanaia Verata, ni solisoli oqo e gole mai na matanitu, ka ra vakavinavinakataka na yalo ni lomasoli kei na loloma e salavata kaya yani.

Na waqa, e tukuna o Ratu Sevanaia, ena mai yaga sara vakalevu kivei ira na lewenikoro. “E dua na ka e sa na rawa ni ra raica taumada sai koya na qoli butako e vakayacori tiko ena nodratou iqoliqoli,” e tukuna o Ratu Sevanaia.

Na qoli butako e tukuna ni sa qai tosocake tikoga, dina ga ni ra kila vinaka tu ni cala na ka era cakava tiko.

Era sa vakalaiva tu ga ia era sa vakila tiko ni vaka me sa drava mai na nodra iqoliqoli.

Na qoli butako e vakayacori tiko ena bogi, ka tukuna o Ratu Sevanaia ni ra laki volitaka na nodra ika kivei ira na dau voli ika e Suva kei Nausori.

Ko ira kece na qoli butako tiko oqo e tukuna ni sa tu na nodra makete.

E dua tale na ka ena mai yaga kina na waqa na kena vakaleletaki eso na iyaya ni paipo kina na koro. Eso talega na leqa me vaka na nodra vaqarai eso era yali tiko e wai, e tukuna o Ratu Sevanaia ni na rawa ni vakayagataki kina na waqa.

Na waqa e tukuna ena vakayagataki talega ena nodra qoli na lewenivanua.

E tukuna o Ratu Sevanaia ni sa laki raica sara mai Nausori na waqa kei na idinicavu.

E dua na ka e sa na rawa ni ra raica taumada, sai koya na qoli butako e vakayacori tiko ena nodratou iqoliqoli. Ratu Sevanaia Verata Gusu ni vosa ni koro e Ucunivanua, Verata, Tailevu.