Kau na ose ki Gau me veivuke vei ira na dau teitei
Edua na kerekere era cakava mai Gau ki na Tabana ni Teitei me laki ta na gaunisala ki na nodra iteitei (Farm Road).
Ena nodra mai dabe na ivakalesilesi e cake era raica ni na dredre na kena ta na gaunisala ia ena rawarawa ke vakarautaki ga na ose. Ena macawa sa oti e tukuna na turaga na Distirct Officer (DO) mai Gau o Revoni Rakasavu ni sa sobu yani e 32 na ose ena wavu mai Qarani.
Ni ratou tarogi na Tabana ni Teitei e qai tukuna na nodratou gusu ni vosa o Eremodo Tuni ni la’ki voli na ose mai Sigatoka, ka na kedra isau e tiko mai na loma ni $400 - $500 dua na ose, ka na vakatau mai na kedra levu.
E tukuna o Tuni ni 32 na ose oqo era na laki wasea na veikorokoro mera tau ya rua, dua na tagane ka dua na yalewa.
Na veikoro mai Gau o Sawaieke, Somosomo, Nawaikama, Nukuloa, Levuka-i-gau, Lovu, Vadravadra, Yadua, Navukailagi, Qarani, Vione, Lekanai, Vanuaso, Nacavanadi, Malawai kei Lamiti.
Ko ira na ose oqo e tukuna o Tuni mera la’ki veivuke mai ena kena kau mai na nodra ivoli mai na nodra iteitei ki na koro.
Ena gauna oqo e tukuna o Rakasavu era colacola mai na nodra iteitei kina koro ka ra sa dau oca kina vakalevu.
Na ose, e tukuna o Rakasavu, ena veivuke sara vakalevu vei ira ni levu era sa qase era sa dau kerea na veivuke ena kena kau mai na nodra ivoli kina koro.
E gadrevi mera la’ki va kawa na ose ka qo na vuna e tukuna o Revoni e soli kina e dua na ose tagane kei na dua na ose yalewa kina veikoro.
E la’ki voli na Ose mai Sigatoka, ka na kedra isau e tiko mai na loma ni $400 - $500 dua na ose, ka na vakatau mai na kedra levu. Eremodo Tuni Gusu ni vosa ni Tabana ni Teitei