Na Meca Levu Ni Bisinisi Na Dinau
Evakaraitaka e dua na dau vakamakete e Korovou, Tailevu, o Vilimaina Waqa ni meca levu ni bisinisi na dinau. Na marama oqo e cavutu mai na yasana Kadavu ia sa vakawati ki Nayawasara ena yasana o Tailevu. E tekivu na nona vakamakete o Vilimaina e Korovou ena yabaki 2000. Ena gauna oqo e volitaki kakana dina, draunikau, vuanikau kei na yaqona.
Ni oti na veisiko ni Fiji Sun ki na Ratu Kadavulevu School ena Vakaraubuka sa oti me la’ki tarai mai na itukutuku ni sotasota ni veibure se na Inter-House, e mai kele ena makete e Korovou ka veivosaki kei Vilimaina. E tukuna o koya ni nona yaqona era kauta mai na nona tauvu mai Ra.
Na nona vuanikau e volia mai vei ira na dauteitei e Dawasamu ia na nona apolo e volia mai Nausori o koya e voli mai Niusiladi. E tekivutaka na nona volivolitaki ena $30 ka la’ki vakayagataka e dua na nona veikilai ena baqe ni National Bank of Fiji (NBF) me dinau mai kina.
Ni sauma oti na nona dinau, e sa iotioti sara talega ni nona dinau ena dua na vanua.
Ena nona volivolitaki, e a sauma eso mera vukei koya ia ni oti era sa qai vakateveli talega.
Ko ira sara ga oqo e tukuna era sa qai lawakitaki koya tale ka ra vakadredretaka na nona bisinisi. Esa toso tikoga na nona vakamakete ka sa qaravi iratou na nona matavuvale ena ilavo e rawata mai ena volivolitaki.
Erau sega ni vakaluveni ia erau susuga e dua na goneyalewa ka sa cakacaka tiko ena gauna oqo. Ena so na siga e dau rawata walega e $20, ia ni sa tawa na teveli ena kakana kei na yaqona e dau rawata sara e $300 ki na $400.
Na nona ivakasala ga, meda dinata na ka eda qarava ka vakaliuca na Kalolu ena veisiga.
“Mera rokovi na dau ni volivoli ka kakua ni ra lasutaki,” e kaya. “Mo lomani ira ka kauwaitaki ira talega na volivolitaki ena makete. “Na kena itinitini ga mo kua na dinau baleta ni meca levu ni bisinisi.”
E tekivutaka na nona volivolitaki o Vilimaina Waqa ena $30 ka la’ki vakayagataka e dua na nona veikilai ena baqe ni National Bank of Fiji (NBF) me dinau mai kina.