‘E vakarau tu ko Viti’
NA veiqaravi nei Viti kivua na Matabose Cokovata kei Vuravura e dau yavutaki mai ena kauwai vei ira na lewenivanua sega ni tutaki vinaka kei na gagadre ni veitaqomaki ena vuravura. Oqori na nodra vosa na liuliu ni matanitu, Paraiminisita Voreqe Bainimarama ni oti e 50 na yabaki nodra veiqaravi na matanitu ena Matabose cerecere ka vakananumi kina na yabaki 75 ni soqosoqo oqo.
Ko Viti e mai rawata nona tu vakataki koya ena 1970 ena 10 ni Okotova ka oti e tolu na siga esa curuma na Matabose Cokovata kei Vuravura.
“Au vakananuma na gauna oya, na yalo ka curuma tu na noda lewenivanua ni ko Viti e rawa ni vakaitavi ka solia edua n aka yaga ki na vuravura ka rawa ni dua n aka vinaka e rawata mai kina,” kaya ko PM
“Oira na noda sotia era vakaitavi ena cakacaka dredre ni veisaututaki ena veivanua ni valu vakarerevaki ena noda vanua.” Vakaraitaka ko PM Bainimarama ni o Viti edua na matanitu ka imatai me vakalawataka na lawa ni waitui ka nikua esa vakayacora tiko na kena manidiataki kei na lewa matau ni yau bula ena waitui.
“O Viti e imatai ni matanitu me vakalawataka talega na Paris Agreement ka vakakina nui matai ni matanitu me liutaka edua na bose levu ni Matabose Cokovata ena Draki Veisau ka vakadreta na kena vakalailaitaki na kaburaki ni kasi duka ena maliwa lala me saiva ena 2050,” kaya ko PM Bainimarama.
“Io eda sarava na bolebole vou ka sa tarai keda kece mai na matanitu lalai kei na kena tarai keda mai na revurevu ni bula raraba, kei na tubu ni bula eda yacova rawa ena 10 na yabaki vakacaca ka sa mai sotava na dredre ni kena sa tekivu tasiri yani.” Vakaraitaka ko Paraiminisita Bainimarama ni iwali ni COVID-19 e sega ni rawati vei ira na matanitu era sega ni rawa ni voli ni oti e vica na vula na kena veitauvi mai. Ni oti e 5 na yabaki ena veitalanoa mai Paris e se tubu tikoga na vakarauni ni katakata ena maliwa lala ka se vakilai tikoga na tubu ni ua luvu ka vakarerevaki sara vei keda na matanitu lalai na kena revurevu.