Vakatubu ilavo vei ira na marama ena veivukei

NA nodra dau kauwaitaki na marama ena sasaga ni vakatubuilavo ka mera vakaitavitaki ena cakacaka ni veiqaravi ena tikotiko edua na sasaga vinaka baleta ena dau veivukei ena gauna ni leqa tubu koso.

Vakabibi ena gauna dredre eda dau sotava ena draki veisau kei na leqa tubu koso me vaka esa yaco vakawasoma tu ena siga nikua.

Mai vakaraitaka voli na tikina oqori na vunivola tudei ni Minisitiri ni Marama, Gone kei na Valuti ni Dravudravua, Jennifer Poole ena nodra laki dolava edua na boseka ni nodra dau vakaqaqacokataki na marama ena gauna ni veiqaravi merawa kina nira dau sotava ka valuta na dredre ni leqa tubu koso.

“Na neitou minisitiri esa tuvakarau me veitokoni ena cakacaka ni veiqaravi nodra marama ka mera vakaqaqacotaki ena gauna era sotava kina na dredre ni leqa tubu koso,” kaya o Poole.

“Me rawa ni kua ni dua e guilecavi voli ena gauna ni lakolako oqo ni veiqaravi ka mera vakatautauvatani ena nodra qaravi ka laveti nodra bula.”

Kuria ko Poole ni matanitu esa vakila na yaga ni nodra qaravi vinaka na marama ka mera dau vakaqaqacotaki ena nodra itavi, me vaka nira kila nira dau sotava e levu na veimataqali bolebole ena nodra bula. Oqori na imatai ni sasaga ni veivakaqaqacotaki era dau vakila na marama ni ira vinaka na cava me dau caka ena gauna ni veiqaravi ia sa dodonu kina mera dau tokoni tikoga ena tabana vakailavo merawa ni buli kina edua nodra vurevure ni ilavo ena veisiga ka mera vakadeitaki ena gauna ni leqa.

Na kena tadu mai na mate dewa ni COVID-19 esa vakilai talega ena nodra bula ni sasaga na marama kei na lewenivanua ena veitikotiko ka sa dodonu kina me vakalevutaki na vakatubuilavo ena tabana oqo. “Na cakacaka ni veivakaqaqacotaki me baleta na valuti ni leqa tubu koso edua na cakacaka vinaka ena gauna oqo ena veivakatauvatani ni veitabana ni bula raraba me vakabibi ena nodra bula na marama,”kaya o Poole.

“Oqo edua na veiqaravi ka sa dodonu me vakarabailevutaki me baleta na kena laveti cake na nodra bula na lewenivanua vakabibi na marama, gone yalewa kei ira na gone.

Qai vakauasivi nida raica tiko yani vakarabai levu na cakacaka ni vakaqaqacotaki ni bula ena gauna ena lako curuma kina na leqa tubu koso.

Ko ira na vakaitavitaki ira ena boseka ni nodra dau vakaqaqacokataki na marama ena gauna ni veiqaravi me rawa kina ni ra dau sotava ka valuta na dredre ni leqa tubu koso.