Vakayaco vuli na tabana ni bula
ERA vakayaco vuli na Tabana ni Bula vei ira na soqosoqo ni veiqaravi ena taudaku ni matanitu ka ra veitokoni kina na veitabana eso vaka na Medical Services Pacific kei na Rama Krishna Mission. Era liutaka na vuli oqo na liuliu ni daunivakasala ni tabana ni bula ena noda vanua Dr Jemesa Tudravu ka vakaraitaka ni oqo edua na sasaga mera laveti kina na kila vakavale ni cakacaka baleta na COVID-19. Vakabibi na kena dau dikevi na tamata cakacaka ena ena vanua se vale ni cakacaka ena gauna ni bera nira tekivuna nodra veiqaravi ena dua na siga se ena gauna e vakilai kina vei ira na mate taka.Vakaraitaka ko Vuniwai
Tudravu ni vuli oqo ena vukei ira vakalevu ena nodra qarauni na lewenivanua ena noda vanua baleta na kena qarauni se taqomaki na nodra bula
“Ena levu tale na daucakacaka era na vulica na veika esa tuvaka taki baleta na ivakarau ni tataqomaki ena dodonu me qaravi se vakayacori tiko ena vale ni cakacaka ena gauna oqo,”kaya ko Vuniwai Tudravu.
“Au gadreva meu vakavinaka kina kin a matanitu o Ositerelia ena nodratou veitokoni baleta na neitou sasaga oqo ka mera vukei kina na lewenivanua ena noda vanua.” Vakaraitaka talega o Vuniwai Eric Rafai edua ka vakaitavi talega ena vuli oqo ni nodra dikevi vakaira na lewenivanua ena vanua ni veiqaravi vakacakacaka e vakalailaitaka na ririko ni veitauvi ni mate oqo na COVID-19. Sa uqeti kina na veitabana vakacakacaka mera vakayagataka tiko na iwalewale ni veiqaravi ni nodra dikevi na lewenivanua ena nodra valenicakacaka.
“Ena veiyabaki era dau mai dikevi e vuqa saran a lewenivanua me baleta na nodra mate sureti se okoya e vua mai ena nodra ivakarau ni bula me vaka na mate ni sucu, se kato ni gone ia e dodonu me dau qarauni na veiwekani vakacakacaka ena vanua ni veiqaravi me vakarawarawataka vua na tabana ni bula me dau mai vakayacora na vakadidike oqo.” Na inaki ni tabana ni bula oya me vakalevutaka tiko na mataqali vakadidike oqo ka mera veitokoni mai kina na vanua ni cakacaka kei ira na itaukei ni cakacaka.