Lagiti na baqe kei esia

ERA sa vakavinakataka na baqe levu kei Esia na turaga Vunilawa ka Minisita ni Veika Vakailavo, Aiyaz Sayed-Khaiyum ena veivuke kei na veitokoni levu sa vakauacori tiko mai ena gauna dredre ni COVID-19

Vakaraitaka na nodra rai na Minisita ena vukui Viti ena dua na boseka era vakayacora oya na ika 30 ni boseka ni Baqe kei Esia kei ira na matanitu ena wasa Pasivika, ka ra vakaitavi mai kina ko Tonga, Samoa, Cook

Islands kei Viti. Ciqoma ka lagita na Minisita na totolo walega ni nodra rogoca na kaci ni kere veivuke na veimatanitu ena gauna ni COVID-19 ka ra vakarautaka kina edua na veivuke vakailavo ka tiko ena $50 na milioni. Vakabibi vei ira na matanitu era vakaleqai ka sotava na dredre ni bula vakailavo baleta saraga na mate dewa oqo na COVID-19.

“Au gadreva meu vakaraitaka na neitou vakavinaka kina ADB ena nodra vakarua taka na veivuke vei Viti main a $100 kina na $200 na milioni me baleta na tuvatuvaka vakailavo kei na nodra veitokoni ena sasaga ni vakatubuilavo vei ira na bisinisi,” kaya ko Vunilawa Sayed-Khaiyum.

“E vukei Viti saraga vakalevu na totolo ni veiqaravi ena nona tuvaka taka vakamatau na nodra ilavo ena gauna esa dredre kina na bula ni rawaka vakailavo ka vakaukauwataka na noda ituvaki ni bula vakailavo ka maroroi tu ena gauna esa lutu kina na veivoli vakailavo ena saravanua.”

Vakaraitaka na nodra vakavinaka na Vunilawa ena vuku ni matanitu ena nodra veitokoni mai vakakina vei ira na Baqe kei Vuravura kei na Baqe kei Esia dau veivuke ena veivakatorocaketaki lelevu.

“Na nodratou vukea na noda kabana ni waqavuka edua na imatai ni gauna me veivuke kina kina na noda tabana ni vuka. Oqo edua na veivuke levu kina noda kabana ni vuka ka vakakina ena veimatanitu ena wasa Pasivika.”

“Keitou sa veitalanoa talega kei na ADB ena nodratou iwalewale ni veivuke me vakataberi edua na lawa ni vemaliwai se veiwekani ena veivukayaki kei na sasaga ni kena laveti cake tale vakatotolo na bula vakailavo ena noda vanua.”