Sasaga cake ko Batiki

NA nodra sasaga na wekada mai Batiki mera saqara vakalevu na waiwai buli e na niu ena dua na vakaduri bisinisi tauyavutaki mai na yanuyanu ena taudaku kei Viti Levu sa dua na gaunisala ni vakavure ilavo me vukea na nodra bula ena veisiga ka laveta talega na nodra itagede ni qarava na nodra matavuvale.

Tauyavutaki na bisinisi oqori ena loma ni 4 na yabaki sa oti ena dua na sasaga lailai ni solesolevaki vakoro ka sa mani dewa yani me vakaduri me dua na bisinisi lailai ka vakatokai tiko ena yaca na Bula Baitik. Era saqara na waiwai ka buli mai ena niu ka vakabatabatataki nib era ni kena tawani ena tavaya vakamatau ni bera ni kena maketetaki yani ena veiyasai Viti.

Sa yaco sara kina vei matanitu ena veiyasai vuravura me vakai Niusiladi kei Europe. Ia era vakayaco bisinisi tikoga ena dua na tikina lailai ka sega sara ni vakarautaki vakalevu. Ena gauna era tekivu kina era lakova tikoga na makete ni veiwekani taumada nibera ni tauyavutaki vinaka na kena makete vei ira na saravanua kei ira na dau taleitaka na vakayagataka na waiwai bulabula ka taya main a niu. Ko Joseva Bolabasaga edua na manidia ni sasaga oqo ena Bula Batiki ka vakamacalataka okoya na sasaga oqo ni se bera saratiko ni yacova na kena gauna me matua vinaka kina, dinaga ni sa rawaka vakailavo tiko mai. Ena gauna oqo esa rawata tiko na vakatubuilavo ena $40,000 ena dua na yabaki.

Ia ena nodra goleyani na Paraiminisita Voreqe Bainimarama mera laki dolava edua na volau vou ni buli ka saqara na waiwai main a niu oqo esa vakadeitaka vei ira na lewenivanua e Batiki ni nodra sasaga vaka bisinisi esa rawa ni laveti cake tale.

En gauna oqo eratou saqara na waiwai ka buli na iyaya ni sausauni ni yago ka dua talega oqo nodra sa sasaga mera bulia na sovu se ilumu ni papa ni vakaseua se surf boards na dau ni saravanua. Oqo edua na sasaga vou ka vu mai ena nodra vakatubuilavo e valagi.

“Ena gauna oqo era veiqaravi tikoga na lewenivanua ena noda yanuyanu vakaturaga e Batiki ka veivuketaki tikoga me vaka edua na solesolevaki vakavanua,” vakaraitaka ko Bolabasaga.

“Na inaki e tiko oya mera vakalevutaki na sasaga oqo ena kena mai tavoci na volau ni saqa waiwai oqo.”

Na tikina o Batiki e tiko kina 4 na koro o Mua, Yavui, Manuku kei Naigani ka ra veivuketaka tiki na sasaga oqo. Era marautaka vakalevu na lewenivanua na veivuke oqo me vaka nira dau vakayagataka tu eliu na nodra vale ni bose ni koro mera saqara kina na waiwai ni niu.

ITaba: FELIX LESINAIVALU 1. Laurai toka e cake oqori na solar panel ni Batiki Nursing Station. 2. Tadu yani kina Batiki Nursing Station o Paraiminisita Voreqe Bainimarama (salusalu ena imawi) kei na iliuliu ni Bose ni Yasana o Lomaiviti o Joji Qaranivalu kei ira na vakailesilesi vakamatanitu. Gauna talei vei ira na gonevuli kei na qasenivuli mai Batiki mera taba vata kei na turaga na iliiuliu ni Matanitu Voreqe Bainimarama.