Marautaki na livaliva, wai e Nacavanadi
ERA maqusa na lewenivanua ena koro vakaturaga ko Nacavanadi ena tikina ko Vanuaso ena Tikina levu ko Gau ena nodra laki dolava na nodra livaliva, kei na medra wainigunu savasava na liuliu ni Matanitu, Paraiminisita Voreqe Bainimarama. Vakaraitaka na liuliu ni soqosoqo vakamarama, Taraivosa Golea yabaki 64 na nodra vakamuduo kivua na matanitu kei na kena liuliu, Paraiminisita Bainimarama ena kena nanumi ko Nacavanadi ena veiqaravi ni veivakatorocaketaki vakamatanitu ka me bau laki semati talega na nodra livaliva ena kaukauwa savasava ni siga kei na kena vakadrodroi na wai ni gunu savasava ki na nodra loma ni koro raraba.
“Au sa vakavinavinaka ena kena sa mai semati na veivakatoroicaketaki ni matanitu ka sa vakararamataki kina na koro ka vakakina ena kena
vakadrodroi na wai. E dua n aka keimami taka vakalevu na kena mai dolavi na wai ena dua na gauna balavu keimami tubucake mai. Keimami sotava tumai na leqa ni wai,” kaya ko Golea. “Keimami sa dau tagica lo vakabalavu na lewenikoro oqo vei ira na neimami turaga na kena leqa tu na wai me bau vakavinakataki, me vaka ni dua na gauna oya kei mami sa leqa talega ni mai curuma na neimami tobu ni wai na boto ka sa vakarerevaki saraga vei keimami ena kena sa vakadukari tiko.
Kuria ko Golea nira kerea na lewenivanua me tovolei me dua tale na mataniwai ka sa mani vakabau ka rawati me vakadrodroi mai na wai ena nodra iso ni wai na koro o Malawai ka toka e cake. “Me yacova mai nikua edua na to vure ni wai esa vakasucuma mai edua na wai mai Malawai ka ra laki kerea na turaga ka ra laki veivuke talega ena kena tara. Ka sa wai batabata vinaka saraga ka sa rogoci kina nei mami tagi ka vakavatukana kina
na tatadra.
Vakaraitaka ko Golea ni ra marautaka talega na kena sa mai vakararamataki na nodra loma ni koro ka sa vukei ira na marama kei na gone ena nodra qarava na nodra itavi ena loma ni vuvale me vaka na qaravi ni lesoni ni vuli vei ira na gone. “Na kena ikarua oya na kena sa vakararamataki na neimami koro, oya ena kena qaravi na neimami vuvale ena nodra qaravi na isolisoli, keina neimami sa maqusa na qarava na neimi itavi vakamarama ena loma ni vale.
Vakaraitaka na nodra turaga ni koro, Vilimone Tikoitani nira marautaka na nodra sa semati ena wai ni guni savasava kei na kena vakararamataki na nodra koro.
“O Nacavanadi edua na koro ka dau vakayacori kina e levu na soqo ni tikina Vanuaso ka sa dua naka na neimami marautaka na lewenivanua na kena mai dolavi na wai ni gunu kei na vakararamataki ni livaliva ena koro,” kaya ko Tikoitani