Vakamuduo vei Japani na Tui Naloto
VAKARAITAKA na nona vakamuduo na turaga na Tui Naloto o Ratu Sakiusa Verebasaga na nona sa dolava yani na mata ni Matanitu o Japani e Viti ko Omuro Masahiro e tolu na vale ni vuli vou ka veivuke mai kina vakailavo na Matanitu o Viti.
E vakailavotaka na tara ni veivale ni vuli oya o Japani ena $190,00 ka qai vakuria o Viti ena $433,000. “Io, e dua na siga guiguilecavi dredre vei keimami na itaukei ni koronivuli na veika mai vakayacora oqo na mata ni matanitu o Japani na kena mai dola na veivale ni vuli vou mera vuli kina na kawa kei Viti era mai vakarautaki eke ena veisiga ni mataka,” e kaya ko Ratu Sakiusa.
“Sa dua na vakacegu levu e yaco vei keimami eni keimami raica vata na dredre e sotava tiko na nodra bula na isolisoli ena kena leqa tu na koronivuli. Na kena sa mai vakarusai na koronivuli makawa era a tara na neimami qase.”
“Era tauyavutaka ena nodra dela ni liga lala, era ligalala na neimami qase ena gauna oya ena loma ni yavusa o Naloto.”
Kaya na turaga na Tui Naloto ni gauana e liu era laki vuli na lewe ni yavusa o Naloto ena tolu na koronivuli, oya ena Nasautoka Dustrict School, Wailotua District School, kei Sawakasa District School. “Ena gauna eliu e se ivoli levu duadua tiko kina ena vanua oqo na jaina ka dau yacana tu ena gauna oya vei ira na neimami qase na ‘bete balabala’ era solia na levu ni kisi jaina era tawana sega ni saumi vei ira e dua na kena ilavo era solia kece kina ka e baleta na koronivuli,” kaya o Tui Naloto.
“Sa mai vakavotukana na sasaga oya ni tara rawa kina e dua na vale ni vuli vale vakaviti oti sa qai tara e dua na vale kau koya sa vakacacana na cagilaba o Winston, na kena isosomi koya sa mai doodloiga kina oqo na matanitu o Japani kasa vale buloko tu edaidai.”
Luvuci ena vakavinavinaka na turaga na Tui Naloto o Ratu Sakiusa Verebasaga ena lomasoli ni matanitu o Japani ena kerekere malumalumu a gole yani ena nodrtaou koronivuli.
“Sa vuabale neimami vakavinakavinaka kina Matanitu o Japani, keimami vakavinavainaka talega kina Matanitu ena kena tokoni tiko mai na sasaga oqo ni koronivuli e Naivicula.”
“Au vakavinavinakataki ira na vakailesilesi taucoko sara ni koronivuli, vakavinavainaka talega ena nodra bula tiko na itubutubu ena vuku ni veiqaravi levu era qaravi ira tiko kina na isolisoli,” kaya na turaga na Tui Naloto.
Era taba tiko oqori na Minisita ni Vuli o Rosy Akbar kei na mata ni matanitu o Japani ki Viti ko Omuro Masahirkei ira na gonevuli e kena marautaki na dola ni nodra vale ni vuli vou e Tailevu.