$7 na milioni na veivakatorocaketaki
ERA baci vakaraitaka tale na Matanitu nei Paraiminisita Voreqe Bainimarama na yalodina ni nodra semata na veivakatorocaketaki main a loma ni tauni ka vakadewa yani kina yanuyanu ena taudaku kei na Viti Levu kei na Vanua Levu.
Oqori ena nodra laki tavoca na liuliu ni Matanitu, Paraiminisita Bainimarama e rauta ni vitu veimama na milioni na dola na isau ni veiqaravi ni veivakatorocaketaki ena veiyatu yanuyanu e Lomaiviti. Ratou wili kina o Koro, Batiki kei Gau ka vakadeitaka tiko kina na usutu ni veiqaravi ni nodra matanitu oya mera vakatauvatani taki na laveti ni bula ena veivanua kece sara veitalia na duidui ni vanua era tiko kina.
Mai Koro era laki dolava vou na nodra koro ni cakacaka na ivakalesilesi vakamatanitu mai Nasau ka wilikina na nodra vale ni wai se valenibula vou, nodra valenivolavola na tabana ni teitei ka vakakina na nodra valeni veiqaravi na vukevuke ni DO se talai veivuke e Koro. Era laki dolava talega edua na nodra koronivuli vou mai Nakodu Koro primary school. Laki solia talega e rua nodra waqa kei na kato ni wai liliwa mai Navaga kei Namacu.
Edua na mala ni vosa e matalia vua na liuliu ni matanitu oya ni na “Sega ni rua na mataqali bula e bula taki ena noda Viti baleta ni dodonu mera vakila vakatautauvata na lewenivanua raraba ena noda vanua.
Nodra gole i Batiki era laki tavoca kina edua na nodra volau ni saqari ni waiwai mai na niu ka medra tawani tavaya taki ka mera volitaki sara yani ena vuravura levu. Na sasaga oqo esa vakayacori tiko ena loma ni 3 na yabaki ka sega voli na nodra volau ka ra dau vakayagataka voliga na nodra vale ni bose vaka Koro. Laki dolava talega na nodra solar vou ni vakasucumi ni livaliva main a kaukauwa ni siga na vale ni wai mai Batiki. Era qai gole I Gau mera laki dolava na nodra wai ni gunu savasava mai Nacavanadi ka vakakina edua na nodra solar ni livaliva. Era laki solia talega e rua na waqa ni qoli vei ira na dauqoli mai Sawaieke.