VUKEI VITI ENA ICULA
ERA tadu mai ena noda vanua e lewe 8 ivakalesilesi ni tabana ni bula mai Ositerelia kei Niusiladi mera mai vuke Viti ena veiqaravi sa vakayacora tiko baleta na veitaqomaki ena mate taka oqo na COVID-19.
Oqo e salamuria tikoga na kerekere ni matanitu o Viti mera veivuke mai o rau na matanitu vuvale erua ena ivakalesilesi era tiko veiira na kila vakacakacaka me vukei ira na ivakalesilesi era sa veiqaravi tiko ena noda vanua.
Ratou na mai siga 28 na ivakalesilesi oqo ena noda vanua ena kena sasaga taki eso na vanua galala mera vukei kina oira na sega ni tauvi ira na mate taka oqo na COVID-19 ka vakaukauwataki na veiqaravi.
Vakavinakataka o Ositerelia na nodra veiqaravi taumada na lewenivanua kei na vakalesilesi ni tabana ni bula ena taqomaki ni vanua o Viti.
E vakaitavi na Mata ni matanitu ko Ositerelia
e Viti ko John Feakes na kena soli ki na noda matanitu e 50,000 na i cula ni tatarovi ni mate taka na COVID. E ciqoma e na vuku ni noda matanitu ko Vuniwai Ifereimi Waqainabete na Minisita ni Bula.
Na veivuke qo e tiki ni yalayala ni matanitu ko Ositerelia me baleta na nona vakarautaka mai na i cula ka me na vukea na matanitu e na cula ni lewe ni vanua o Viti.
Vakacaucautaka na noda Tabacakacaka ni Bula ko Feakes ka kaya ni sa dua na i tavi vinaka e ra qarava tiko ni sa cula oti e sivia ni 250,000 na lewe ni vanua e Viti e ra sa cula oti e na matai ni cula ka 17,000 e ra sa cula oti vaka rua. E vauqeti keda na lewe Viti o Feakes me da cula kece ka kaya ni vakarautaka na nona matanitu e Dua na Milioni na i cula me mai qaravi kina na veicula e noda vanua ka sa tu vakarau tale ga na matanitu ko Ositerelia me na vukei keda e na valuti ni mate taka na COVID 19.
Na veivuke tale ga qo e sala muria tiko na veidinadinati ni matanitu e rua ka vakatokai koto me Vuvale Partnership.