Na bukete kei na COVID-19: Dr Bavou
KO Vuniwai Moape Bavou e kenadau na kena qaravi na marama tiko bibi ena valenibula e Colonial War Memorial Hospital (CWMH) e Suva. E a tarogi vua se leqataki talega na nodra bula na bukete ena ena vuku ni Covid 19?
Kaya o Vuniwai Bavou ni mate oqo e leqataki kece vei keda na lewenivanua vakabibi e Viti ni toso cake tikoga na wiliwili e veisiga yadua. Na nona leqataki e dua na bukete e vaka talega e leqataki e dua na lewenivanua e sega ni bukete.
“E dua ga na leqa o koya e bukete e qaravi
tiko kina e rua na tamata,o tina kei gone e kunekunetaki tiko, kaya o Vuniwai Bavou. Na sala kecega ni tataqomaki sa kacivaki tiko ena retio,tv se mona livaliva sala kece e rawa ni vakayagataka na yalewa tiko bibi me taqomaki koya mai na Covid 19.”
“Na iubi ni gusu kei iubi ni ucu me coba tikoga ena veigauna kece eda biuta kina na noda duivale kaya o Vuniwai Bavou.”
Keitou taroga vei Vuniwai se rawa ni vakadewa taka e dua na tina e kunekune tiko ena gauna qo na Covid 19?
“Sega na virus e sega ni rawa ni takosova na iyalati se placenta e kana tiko mai kina na gone kunekune taki tiko”
“Ena gauna ga e sucu mai kina o gone sa qai rawa ni tauvi koya”kaya o Vuniwai Bavou.
“E vakadonui mera vakasucumu ira na luvedra me ubi tikoga na gusudra kei na ucudra na tina”
Kaya o Vuniwai ni ra na sucu ga mai na sala ni gone na gone,ena qai sele ga o tina ke dua na leqa vei tina se ceguleka beka o gone.
Kaya o Vuniwai Bavou ni gauna qo e rua na tina rau a sele rau tiko mai Makoi e rau roqota tiko na luvedrau ka rau vasucuma tiko.E vakatarai vei tinani gone oya.Ia na ivakasala bibi e tiko me dau ubi tikoga na ucui tina kei na gusuna.