Lewe va era sega ni cula mai Vatoa, Ono-i-Lau

E vakaraitaka mai o nasi Necani Caginodoi ka la’ki vakatawa tiko ena gauna oqo mai na koro ko Vatoa mai Ono i- Lau ni lewe va na lewe ni vanua e ratou sega ni taura nai cula ni COVID-19.

Era sa cula oti vakadua e Vatoa ka sa vo oqo na lewe va.

“E Vatoa e dodonu me cula kina e 88 na lewe ni koro, ia e 84 ga era cula.”

Ko iratou oqo eratou sa biu sara tu ga dina ga ni sa vakayacori kivei ira na vei vakararamataki me baleta na icula.

Ko nasi Caginodoi e rawata na nona vuli nasi ena 2016 ka cakacaka ga e Suva.

Ena 2018, sa lesi sara ki Ono-i-Lau me la’ki veiqaravi ena Ono-i-Lau Health Centre.

E tukuna ko Caginodoi ni rua na nasi kei na dua na vuniwai era vakatawa tiko ena Ono Health Centre, e tukuna o Caginodoi.

E yaco yani na itukutuku ki Ono-i-Lau ni sa sega tale ni lesu yani na nasi mai Vatoa ka sa mani lewai me sa gole ko Caginodoi me la’ki tiko vakawawa me yacova ni yaco yani na nasi.

Ni tarogi me baleta na bula e yanuyanu e tukuna ni sa rauti ira ga na kai yanuyanu.

O nasi Caginodoi e cavutu mai Nabaitavo, Naitasiri ka sega ni matau vua na bula ena yanuyanu.

“Au sa mai vakamuria na bula e yanuyanu ia e dau levu ga na gauna e sa dau votu vei au na neitou matanivale mai Nabaitavo,” e tukuna o nasi Caginodoi.

Na kakana e sega na leqa ia ena gauna oqo e bera tiko yani na waqa ka sa lala tiko mai vakamalua na sitoa.

Na vakatatabu me baleta na COVID-19 e tukuna ni so na lewe ni vanua era basuka ka so era vakamuria vinaka.

Ko ira e yanuyanu era mataitaka na caka kakana ena gauna ni leqa.

Ko nasi Caginodoi sa saga tiko me vakamuria na nodra bula ka sa tekivu me matau mai vua.