Bulitavu e dau ni vakasala, dau teitei
Edua na ivakarau ni bula eda kilai tani kina na kawa itaukei, sa ikoya na bula ni solesolevaki.
Oqo na ka era bulataka o ira na noda qase e liu ka sa seavu tiko yani vakamalua ena gauna eda sa bula donuya tiko qo.
Ni da solesolevaki na itaukei eda na vakila kina ni taucoko na noda bula tiko ena dua na loma ni tikotiko vakavanua.
Ia, ena macawa oqo e veivakauqeti tiko ko Mosese Bulitavu vei keda kece sara na itaukei sai koya me da lesu tale ena veika eda kilai tani kina sai koya na bula ni solesolevaki.
Ko Bulitavu e lewena tiko na ito ni veisaqa na Social Democratic Liberal Party (SODELPA).
E levu era dau qoroi koya ena nona dau vosa qaqa e loma ni Palimedi ka sega ni rere, dei, sega ni madua ena nona dau yavalata ka kurea na vale ni bose.
E dina ni dau ni politiki, ia e semati koya vakataucoko tu ena Lotu kei na Vanua.
Na turaga oqo e cavutu mai ena
mataqali ko Namako yavusa Vitina ena koro ko Kedra ena tikina ko Dogotuki mai Macuata.
Na teivaki ni qele e sega ni ka vou vei Bulitavu baleta ni bulataka mai ni se lailai.
E butuka vinaka tu na qele ena kena teivaka na yaqona, dalo, tavioka, uvi, sila, kei na kakana draudrau.
VEIVUKE VEI IRA NA ITABAGONE
E sega ni nanumi koya ga vakai koya o Bulitavu ena sasaga ni toso, ia e nanumi ira na itabagone ena nona vanua ka cakacakavata kei ira.
Nikua esa nodra daunivakasala tiko na itabagone e nakoro ena tuvatuva ni teitei me muri (farming scheme).
E kaya ko Bulitavu ni sa rui bibi na vakayagataki gauna ka meda idusidusi vei ira na tabagone ena vakayagataki qele ni bulu tu kina noda kalougata.
“E dua na iliuliu vinaka vakapolitiki e dodonu me tu saraga iliu ka tara na cakacaka mera sarava na muri tiko mai. Au marautaka na noqu vukei ira tiko na itabagone.”
E kaya na gauna era na lai vakawati se vanua cava era na via gole kina e sana tiko vei ira na kila ena bula ni tuvatuva ka kei na sasaga me rawa kina nodra tiko vinaka mai muri.
“Sa dodonu meda toso vata tiko ka me kua ni dua e guilecavi tu mai.”
CICIVAKI BISINISI
Ena yabaki oqo ea tauyavu e dua
na sitoa vakadeitaki ka yacana na Rasivisivi Investment ka vakayacani vei tukadratou.
Tukuna ko Bulitavu ni sitoa oqo e taukena na koro kei ratou vaka veitacini.
“Na sitoa e duri saraga me vukei ira na lewe ni vanua o Wasavulu Qoibau ena gauni ni dredre kara dau tauri yaya qai saumi ni ra sa tauri ilavo.”
E kaya na duri ni bisinisi oqo sai koya me veivuke vei ira ena kena colati na soqo ni vanua, lotu, kei na nodra solia na dua nai katini vua na nodra iTalatala ni Tabacakacaka o Qoibau.
WALI NI LEQA DRAVUDRAVUA
E kaya ni sa dodonu meda vakayagataka sara vakavinaka na qele me valuta na bula dravudravua.
“Ni toso tikoga na noqu vakaitavi voli ena politiki au nanuma ni yaga ka iwali ni leqa dravudravua na vakayagataki vinaka ni qele kei na solesolevaki me rawa kina nida vakatorocaketaki kei na bula sautu.”
Na sasaga oqo e gadreva ko Bulitavu me idusidusi ka veivakararamataki vei ira na tu vaka vanua ena kena rawati na itavi kena vei vurevure me vakaiyaragitaki ira ena gauna bolebole eda sota kaya tiko ena vuku ni mate e tarai keda tiko oqo na COVID-19.
“E bibi sara vei au na kena vakilai na veivuke ni matanitu me vueta na bula ni tu vakavanua ena bisinisi. E sa dodonu kina meda vakayagataka sara vakavinaka.”
VEIDIGIDIGI 2022
Eda sa vakanamata tu oqo ena veidigidigi levu ena yabaki mai oqo.
E sa vakadeitaka ko Bulitavu nina duri tale ena veidigidigi, ia ena qai kacivaka malua na waqa vaka politiki ena lewena.
Meda lesu kina qele: Tui Namosi
Na dredre ni bula eda lako curuma tiko ena gauna oqo ena sega ni dodonu meda na veidusi kina.
Ia, e tiko sara ga ena qeteqete ni ligada na kena iwali.
Me vaka ni tarai Viti tiko na mate dewa oqo na COVID-19, levu sara na wekada era vakacegui mai ena nodra cakacaka.
E levu era sa tu ga ena vakatabaniuto me rawa ni cakava kece vei ira na matanitu na veika era gadreva.
Na vakatabaniuto e sega ni ka rairai vinaka meda bulataka na itaukei baleta nida butuka tu na noda qele.
Ia, ena macawa oqo e vakauqeti keda tiko na turaga na Tui Namosi ko Ratu Suliano Matanitobua, sa ikoya meda lesu kina qele ka vakayagataka vinaka sara me rawa kina na bula sautu.
Ko Ratu Suli era lewena tiko na
ito ni veisaqa na Social Democratic Liberal Party (SODELPA).
E levu vei keda eda dau raici ira tu ga ena palemedi, raitio yaloyalo se na niusiveva.
Ia, ena taudaku ni nodra cakacaka era dau lesu ivale ka vakayagataka vinaka sara na qele ena kena teivaki me rawa kina na bula ena veisiga.
Tukuna ko Ratu Suli ni sega ni dodonu meda vakaulubale na itaukei baleta ni levu tu na noda qele.
“Na mate oqo na COVID-19 e vulici au, ka vaka kina e so tale na wekaqu ena kena vakayagataki vinaka na qele me rawa kina na bula kei na tiko vinaka ena veisiga,” Tukuna ko Ratu Suli.
Era kaya ni qele eda kana mai kina, rawa ilavo, vaka duri bisinisi, ia na kena dina e tiko saraga vei keda yadudua. Era tomana ka kaya nina sega ni rawa meda vakaulubale tu ga ena veisiga.
Na veika e solia mai na Kalou ena vuravura oqo esa dodonu meda vakayagataka sara vakavinaka ka vakamatau.
Kevaka eda vakaraitaki vinaka tiko na qase vei ira na luveda kei ira na muri mai, era na vakamuria na veika era sa raica tiko. Ia, kevaka eda vucesa, era na vucesa o ira na luveda.
Okoya gona esa yaga kina meda yadrava matua na noda bula ena veisiga ka kua so na vakararavi tu ga vua na matanitu.
Ena sega ni dua ena tukuna vei iko na ka mona cakava me rawa kina na nomu tiko vinaka mai muri. Esa dodonu meda yalomatua ka cakacaka vakaukauwa.
Ko Ratu Suli, era kitaka sara vakaukauwa na teitei ena nodra qele ena koro ko Veivatuloa mai Namosi ena gauna a yaco tiko ena noda vanua na sogosogo kei na vakatatabu ni veilakoyaki.
Era teivaka na dalo kei na yaqona ka vaka kina eso tale na kakana draudrau me rawa kina na nodratou bula vakavuvale ena veisiga.
Mai na veika era teivaka tiko oqo, era sana sega tale ni qai lako ena makete mera volivoli mai kina. E ratou sana kana ga mai ena were. Kevaka esa rawata ko Ratu Suli me cakava qo, oi keda talega eda rawa ni cakava.