Levu na iTaukei e curu e vale ni veivesu e vakaraitaka na leqa levu e bikai keda tu

Na veivala ea yaco e Nabua, Suva, sai vakaraitaki ni dua sara na leqa levu e bikai keda tu na iTaukei.

Oqo na leqa ni basu lawa kei na vakarau kaukauwa.

Esa vakavuna kina me levu taudua na keda iwiliwili ena vale ni veivesu ena noda vanua.

E vuqa na gauna da dau veitalanoataka nai ulutaga oqo ena 14 na yasana.

E dau vakayacori eso na sasaga vinaka mera ciqomi kina ni sa oti na nodra cakacaka taka na nodra itotogi kara suka tale na vanua era a cavutu mai kina.

Ia, esa vo meda dikeva na cava e rawa nida cakava me tarova na basu lawa me tiki ni noda bula ena veisiga ka sa wili me noda itovo talega.

Kena ibalebale ena dodonu me veisau na rai kei na vakasama. Ni bera nira vakayacora e dua na ka e veicoqacoqa kei na lawa o ira na noda gone era na taroga na taro oqo: E dodonu se kilikili meu cakava nai vakarau ca oqo?

Me vaka ni levu vei keda eda lotu Vakarisito e rawa nida taroga na taro oqo: Ena marau taka li na gone turaga o Jisu Karisito na vakasama oqo ni bera niu vakayacora e dua nai tovo se vakarau ca?

Kevaka nai sau ni taro ruarua e cake na sega da kua ni cakava na ka ca.

Na basu lawa na ka ca - lawa ni noda Matanitu se na nona lawa (commandments) na noda Kalou.

Na ka vinaka kece e vu mai vua. Na ka ca kece e vu mai vua na vuni ca ko Setani.

E sega ni rawa nida vakadonui keda ga vakai keda nida vakarau cakava e dua na ka ca.

EDA LUVE NI KALOU

O keda eda a buli meda ucuya na Kalou ka itovo vata kei koya – eda vakatokai kina meda luveni Kalou kece. O keda kece na kai vuravura, dui kawa tamata ka duidui tovo kei na lotu eda luveni Kalou. E lomani keda kece vakatautauvata.

E na levu ni nona lomani keda ea solia na luvena dua bau ga o Jisu Karisito me mai mate ena vukuda me bokoci kina na noda ivalavala ca.

Ni bera nida sucu mai ena vuravura oqo eda a bula vata na Kalou ena vuravura ni yalo, na vanua eda a vakaurautaki kina ni bera noda sucu vakatamata.

Eda a yalataka nida na mai vakamuria na nona i vakavuvuli o Jisu Karisito. Eda sega ni vakasaurarataki ka soli vei keda na galala ni digidigi. Eda a lewena e rua na ikatolu kada digitaka na nona vakatutu na gone turaga o Jisu Karisito. E dua na ikatolu era to vata kei Setani me vakasaurarataki na tamata me muria nai vakavuvuli ni Kalou, me kua ni soli na galala ni digidigi (freedom of choice).

E rua na isolisoli levu e solia vei keda na Kalou ena gauna eda sucu kina. E dua na yalona. Kena ikarua na galala ni digidigi.

Sa da guilecava na ka a yaco mai na vuravura ni yalo. Koya gona o ira na noda lalai era savasava vakaoti e matani Kalou me yacova na gauna era sa kila kina na vinaka mai na ca. Era sa qai papitaiso ka soli vei ira nai solisoli ni Yalo Tabu (Holy Ghost) me nodra tokani ka cilava tiko na nodra gaunisala ena bula oqo.

E mai vakarabailevutaka na rarama sa tiko rawa (light of Christ) ka soli vei keda ena gauna eda a sucu mai kina. E levu era sega ni lotu Vakarisito ia era tamata vinaka kara cakava na lomana na Kalou.

Era dau loloma vakabibi era dau vukei ira na dravudravua kei na malumalumu, era sega ni dau veivakaduiduitaki kara yalo malua, yalo malumalumu ka dau veivosoti.

Na rarama ni Kalou (light of Christ) e vakauqeti ira mera dau caka vinaka ena vei gauna kece.

Oqo e baleta ni tiko vei keda na rarama oqo e sega ni rawa nida kune marau se vakacegu kevaka eda cakava e dua nai vakarau ca. E vaka ga niko via wakia vata na wai kei na waiwai ni idini ni motoka se idinicavu. Ena sega ni rawa ni rau waki vata. Na yalo ni Kalou e tiko vei keda e veimecaki kei nai valavala ca.

NODA ITOVO NA ITAUKEI

E levu na noda itovo nai iTaukei e sala vata kei na nona i vakavuvuli na Kalou me vaka na veilomani, cakacaka vata, lomani ira na tani, dau veivosovosoti, rokovi ni lawa kei na veiliutaki.

Esa mai vakaleqa tu na noda bula veimaliwai nida sa taura eso nai tovo vulagi ka sega ni tiki ni noda bula nai iTaukei.

E laurai kina na lecaika, yalo kaukauwa kei na viavia levu, talaidredre kei na butobuto ni yalo.

Esa vakayavalata na yavu ni noda bula nai iTaukei. Na ka a yaco mai Nabua a kauta mai na loma tarotaro, nui qawaqawa kei na madua.

Na cava nai wali ni leqa eda sotava tiko. E rawa ni da tarova ni bera ni yaco tale e dua?

O cei eda na beitaka? Oqo eso na taro eda na saga meda tasereka ka sauma ena macawa ka tu mai.

ENA QAI TOMANI TALE YANI ENA MACAWA KA TU MAI