Muria tikoga na vakatatabu
NA kena mai rawati na 80 na pasede na cula ni tataqomaki na lewenivanua ena noda vanua esa dua na cavu isausau ena valuti ni mate dewa na COVID-19.
Ia e se vo tale vakalailai me yacovi yani na 90 na pasede ni icula se 100 na pasede me rawa ni da qai vakila edua na veisau vinaka ni veiqaravi ena kena na laveti na vakatatabu kei na sogosogo ena noda vanua.
Oqori na mala ni nona vosa ko Paraiminisita Voreqe Bainimarama ena nona kacivaka tiko na veika esa rawati me yacova mai na vula ko Okotova ni yabaki oqo.
E vakananumi talega kina na yabaki 51 ni tu galala kei Viti.
“E da sa valu vata ena ivalu oqo ka sa da qaqa ena noda valu vata. E sega na ka e uasivita na noda cakacaka vata,” e kaya ko Paraiminisita Bainimarama.
Ia e tukuna o koya ni sa bera ni oti na ivalu ka se tomani tikoga na cakacaka ena yatu e liu kei na nona sasaga tiko na tabana ni bula me ra taqomaki na lewenivanua.
“Sa yaga kina me da na vakamuria tiko ga na vakatatabu ni COVID-19, dina ga ni sa laveti tiko yani vakamalua na vakatatabu,” a kaya ko Paraiminisita Bainimarama.
“Na Matanitu ena vakamuria tikoga na vakadidike me baleta na COVID-19 ni bera ni vakatauci edua na lewa matau ka meda taqomaki tikoga kina.”
E vakaraitaka ko Paraiminisita
Bainimarama ni levu vei ira na lewenivanua ena taudaku ni koro lelevu era se bera tiko ni icula ka ra sega ni se vakadeitaki ira tiko ena gauna oqo.
Sa yaga kina me ra vakauqeti me ra cula baleta me ra rawa ni yaga talega ena ivaluti ni mate na COVID-19.
“Kevaka e ra na bera ni cula ena dolavi tikoga vakamalua na vakatatabu. Kerekere ni vakamuria na ivakaro ni icula me vaka era vakaraitaka na wekada mai Yaro, Kia e Vanua Levu.
“Oira na iyatu e liu ni veiqaravi era na sega ni cegu, era se cakacaka tikoga. Esa dodonu kina me da vakamuria tikoga na ivakaro me rawa ni da marautaka kina na noda galala,” e kaya ko Paraiminisita Bainimarama.