Tavoci mai Nawaka na People’s Alliance
VAKARAITAKA NODRAU VEITOKONI KO TUI NADI KEI TUI NAWAKA
Esa tavoci mai na koro ko Nawaka, Nadi ena macawa oqo na isoqosoqo vakapolitiki na People’s Alliance. Na Peresitedi digitaki ni isoqosoqo na Tui Nadi ko Ratu Navuniyani Navuniuci.
E vakavinavinakataki Tui Nadi kei Tui Nawaka nai liuliu ni People’s Alliance ko Sitiveni Rabuka ena nodrau veitokoni ena kena sa mai duri ka tavoci na isoqosoqo vakapolitiki oqo.
E levu vei ira na a tokona na Social Democratic Liberal Party (SODELPA) era a tiko na kena tavoci na People’s Alliance.
Na taro e tiko na cava e tavoci ka dola mai kina e Nadi na vale volavola ni People’s Alliance.
E tukuni ni dua na iwiliwili levu ni veitokoni era tiko mai ena yasayasa vaka Ra ka ra wili tiko kina na itabagone.
Ko Ratu Navuniyani e vakadreti ira tiko na lewe i Viti me ra tokona na soqosoqo vakapolitiki oqo na People’s Alliance me baleta na vinaka raraba.
E kaya ni ra vinakata mena veiliutaki ena veidigidigi ena yabaki vou ko Rabuka.
Ko Ratu Navuniyani e cavutu mai na koro ko Narewa. Ea taura na itutu vaka Tui Nadi ena 2017.
Ea cakacaka tu vakamatanitu, ka Roko Tui Kadavu tu ena dua na gauna ni se bera ni vakacegu mai ena nodra cakacaka.
Ko Tui Nawaka ko Ratu Asaeli Driu ena dua na veitalanoa ena vula sa oti e tukuna kina ni People’s Alliance ena nanumi ira vakatautauvata na kawa iTaukei ena gauna ena veiliutaki kina.
Ko Rabuka ena nona vosa tiko e kaya: “Qo e sega ni Rabuka ena 1987. Qo na Rabuka ni 2021.”
E tomana ka kaya ni kere veivosoti tiko vei ira na lewe i Viti ena veika ea yaco na 1987.
E vakavinavinakataka ko Rabuka na veitokoni levu e lako tiko mai ena yasayasa vaka Ra.
Ko Tui Nadi e tukuni ni Lotu Kavitu ka dau sega ni vakaitavitaki koya tu ena buturara ni politiki.
Ia, e levu sara era kidroataka na nona sa mai digitaki qo me peresitedi ni People’s Alliance.
Ni lai raici ena nodra vale ena siga Tusiti e tukuna mai vei koya na marama na watina ni sega ni via vosa vua na dau ni vola itukutuku.
Ia, okoya na peresitedi e tu vua na dodonu me vosa ena ka e kila ena vinaka kina na toso ni People’s Alliance.
Na cava era galu vaka tiko?
Oqo e vaka talega vei Tui Nawaka Ratu Asaeli ni kerei me veitalanoa kei na dau ni vola itukutuku ena siga vata tiko ga oya ea qai vakaulubale mai.
ENA QAI TOMANI TALE YANI ENA MACAWA KA TU MAI